VOV4.Bahnar -  Hla bơar kăl găh tơdrong pơjing rơvơn ăn tơdrong sơng iŏk đei kon jên răt phe ƀa tơmam drăm sa kơ yuơ Kơdră chĕp pơgơ̆r Dơnŏ anĭh tơm vei lăng Mơdro sa Nguyễn Hồng Diên kĭ năr 12/08/2021 pơma hơdăh: Vă tơgop tơgŭm ăn rim bơngai mơdro, hơnĭh mơdro, bơngai jang, tĕch mơdro phe, ƀa lơ̆m khei ‘năr đei jĭ hơbŭh Covid-19, Dơnŏ anih mong jên Tĕh đak Việt Nam hlôi chĭh pơtrŭh hla bơar athei rim Hơnĭh mong jên Mơdro sa păng Dơnŏ anĭh mong jên Tĕh đak hơnĭh sơdrai tơ̆ rim dêh char, pơlei tơm tơring Tơmăn đak kroong Cửu Long sơđơ̆ng kon jên ăn tŏk iŏk tơgŭm ăn chă răt, mong răk phe, ƀa tơ̆ tơring Tơmăn đak kroong Cửu Long hăm lơ trong jang. Mă lei, hlŏh đơ̆ng bơ̆ jang dăr lăng hơlen tơdrong tĕch mơdro păng kơtơ̆ng ang pơma dơnŭh hăm Khŭl jang Phe ƀa Việt Nam hăm rim bơngai mơdro phe tơ̆ tĕh đak đe, tơdrong sơng iŏk kon jên kiơ̆ hla bơar pơkăp kơsô̆ 5747 tim gan rơvơn ‘mơ̆i. Vă pơjing rơvơn hlŏh dơ̆ng ăn rim hơnĭh mơdro sa lơ̆m sơng iŏk đei kon jên vă răt phe, ƀa ăn kon pơlei, Dơnŏ anĭh tơm vei lăng Mơdro sa apĭnh Thủ tướng Tĕh đak pơjao ăn Dơnŏ anĭh mong jên Tĕh đak Việt Nam lăng hơlen, pơrô̆ athei rim Dơnŏ anih mong jên mơdro sa đei trong tơgŭm djru hơ iă găh jên chĕh ăn rim hơnĭh mơdro sa; păng pơjing rơvơn ăn rim hơnĭh mơdro sa đei pơdơ̆ng mŭk drăm hăm dôm tơmam drăm vă răt iŏk ‘nŏh hloi.

Tơblơ̆ nơ̆r: Amazưt