VOV4.Bahnar - Dơnŏ anĭh tơm vei lăng Pơtho pơhrăm ‘nao chĭh pơtrŭh hla bơar ăn Kơdră chĕp pơgơ̆r Dơnŏ anĭh vei lăng kon pơlei rim dêh char, pơlei tơm găh tơdrong pơgơ̆r ‘Măng pơlong lĕch ‘măng khoă jăl pêng sơnăm 2021 lơ̆m khei ‘năr đei jĭ hơbŭh. Kiơ̆ kơ ‘nŏh, Dơnŏ anĭh tơm vei lăng Pơtho pơhrăm tơchơ̆t klăh asong ‘măng pơlong lĕch ‘măng khoă jăl pêng sơnăm 2021 jing ƀar ‘măng. Mă hơdăh, ‘măng mă 1 kơ ‘Măng pơlong lĕch ‘măng khoă jăl pêng sơnăm 2021 đei pơgơ̆r lơ̆m năr 7 păng năr 8/7. Dơnŏ anĭh tơm vei lăng Pơtho pơhrăm gô pơgơ̆r ‘măng pơlong mă 2 ăn rim hŏk tro đei ƀơm ư̆h kơ ‘lơ̆ng đơ̆ng jĭ hơbŭh Covid-19, pơ đĭ rim hŏk tro găh rim bơngai F0, F1, F2 ‘moi kiơ̆ hơnĭh jang pơgang hơlen, hŏk tro oei lơ̆m tơring tŏk bŏk pơvang tang găn, pơm kiơ̆ oei hơtăih dĭh băl kiơ̆ Nơ̆r athei jang kiơ̆ đơ̆ng Thủ tướng vă jang kiơ̆ trong tang găn jĭ Covid-19. Găh jơ ‘năr pơlong ‘măng mă 2, Dơnŏ anĭh tơm gô tơchơt hơdăh pơgơ̆r kiơ̆ nơ̆r athei đơ̆ng rim tơring. Dơnŏ anĭh tơm jei athei rim tơring dăr lăng hơlen tơdrong hŏk tro đei ƀơm kơnê̆ đơ̆ng jĭ hơbŭh Covid-19 ư̆h kơ gơ̆h vă vang năm pơlong ‘măng mă 1, pơtrŭh ăn Dơnŏ anĭh tơm vei lăng pơtho pơhrăm hơdrol năr 5/7.

Tơblơ̆ nơ̆r: Amazưt