VOV4.Bahnar - Pơgê năr 6/9, tơ̆ Hà Nội, Dơnŏ anĭh tơm vei lăng Tơdrong jang Việt Nam Pơgơ̆r pơm lê̆h tơlĕch tơdrong jang “Kang ƀô̆, bơngai bơ̆ jang hơdrin yak hlŏh tơnap tap, tơchăr hơgei, hơdrin pơrăm hŭt kĕ jĭ hơbŭh Covid-19” trŭh 83 hơnĭh pơdăh kơtă lơ̆m tĕh đak. ‘Măng jĭ hơbŭh Covid-19 ‘măng mă 4, đơ̆ng năr 27/4 trŭh dang ei hlôi pơrăm kơtang, pơm kơnê̆ tôch kơtang trŭh tơdrong erĭh sa kơ kon pơlei păng tơdrong sơđơ̆ng, atŏk tơ iung mŭk drăm-tơpôl kơ tĕh đak. Mă đơ̆ng lơ lŏh ră, pơ đĭ khŭl jang chĭnh trĭ păng Kon pơlei lơ̆m tĕh đak hlôi tơgoăt mĭnh nơ̆r ƀơ̆r đon, kơrŭn đĭ jơhngơ̆m jang kiơ̆ tang găn ji hơbuh. Tơ̆ pơm lê̆h krao hơvơn, Kơdră chĕp pơgơ̆r  Dơnŏ anĭh tơm vei lăng Tơdrong jang Việt Nam Nguyễn Đình Khang krao hơvơn đĭ đăng kang ƀô̆, bơngai jang đoàn, bơngai bơ̆ jang lơ̆m tĕh đak kiơ̆ yok rok jơ̆ng tơdrong jang jang joăt joe ‘mêm kơ eng tĕh đak, tơgoăt mĭnh nơ̆r ƀŏr đon, yak hlŏh tơnap tap, tơdrong long, kơrŭn đĭ jơhngơ̆m pơting dĭh băl vă hrô̆ih tơpŭh hŭt kĕ jĭ hơbŭh, hơmet pơ ‘lơ̆ng jang sa.

Tơblơ̆ nơ̆r: Amazưt