VOV4.Bahnar - Pơgê năr 9/4, Kơ iĕng Kơdră chĕp pơgơ̆r dêh char Lâm Đồng Phan Văn Đa hlôi đei tơ ƀơ̆p păng bơ̆ jang hăm Kơdră tang măt Phần Lan Kari Kahiluoto.

Rup tơ ƀơ̆p pơma dơnŭh

Tơ̆ jơ tơ ƀơ̆p, Kơdră tang măt Kahiluoto pơma dơnŭh, tơroi tơbăt mĭnh ƀar tơdrong jang gơ̆h păng tơdrong đei gơ̆h vă jang hơdoi kơ Phần Lan hăm Lâm Đồng nhen vei lăng găh đak, đak sŏ nhă rơgŏh păng vei lăng cham char, hơmet pơ ‘lơ̆ng rơ̆m rĕk ... Kơdră tang măt jei pơma trŭh tơdrong pơtrŭt kơtang jang hơdoi găh tơdrong vă jang hơmet pơ ‘lơ̆ng đak mă Phần Lan tŏk bŏklăng trŭh tơ̆ pơlei tơm Bảo Lộc păng tơbăt jơhngơ̆m đon ‘mĕh vă dêh char lăng ba pơtrŭt kơtang jang kiơ̆ tơdrong jang au lơ̆m khei năr kơnh. Kơ iĕng Kơdră chĕp pơgơ̆r dêh char Lâm Đồng Phan Văn Đa bơnê kơ ‘măng năm tơmang păng pơma dơnŭh rơvơn jang hơdoi đơ̆ng Kơdră tang măt păng Khŭl bơ̆ jang. Ƀok tơbăt, Lâm Đồng dang ei tŏk bŏk hơdrin pơtrŭt kơtang atŏk tơ iung lơ̆m lơ tơdrong; lơ̆m au, đei mĭnh ƀar tơdrong mă Lâm Đồng dang ei tŏk bŏk ‘mĕh vă đei trong jang ‘lơ̆ng joăt jang nhen jang hơdoi tơmơ̆t jên jang đơ̆ng păh Phần Lan nhen tơ iung pơjing pơlei tơm gơ̆h hơgei tơ̆ Đà Lạt păng Bảo Lộc, vei lăng găh đak, hơmet pơ ‘lơ̆ng rơ̆m rĕk, đak ‘mê̆ ‘mach, vei lăng bri hăm kmăi kmŏk.

Tơblơ̆ nơ̆r: Amazưt