VOV4.Bahnar - Khul kơ dră chĕp kơ̆l Jơ nŭm pơ gơ̆r kon pơ lei păng Dơ nŏ anĭh vei lăng kon pơ lei dêh char Gia Lai pơm lêh et hơ tŏk Anĭh gru groa so tôch gĭt kăl kơ Jơ nŭm pơ gơ̆r kon pơ lei păng Dơ nŏ anĭh vei lăng kon pơ lei kăch mang dêh char Gia Lai (đơ̆ng 1968-1975) tơ̆ plei Tăng Lăng (xăh Krong, apŭng Kbang). 

Lêh et hơ tŏk anĭh gru groa so

Anĭh gru groa so kơ kăch mang âu jĭ tơ ring tôch gĭt kăl lơ̆m jơ hnơr iung tơ blăh kơ kăch mang dêh char Gia Lai đơ̆ng 1955-1975. Tơ̆ âu, lơ anĭh chĕp kơ̆l kơ dêh char đei pơ jing lơ̆m dôm sơ năm tơ blăh tang găn hơ yăt Mi dŏng tĕh đak tôch krưp krĕnh; lơ̆m nŏh đei anĭh jang kơ Jơ nŭm pơ gơ̆r kon pơ lei kăch mang păng Dơ nŏ anĭh vei lăng kon pơ lei kăch mang dêh char.

Đơ̆ng rŏng hlŏh 2 khei tơ lĕch man, anĭh gru groa đei man đang păng tơ mât yoa ƀlep ƀât tơ băt 46 sơ năm Năr tơ blăh iŏk rơ ngei dêh char Gia Lai (17-3).  Anĭh gru groa kơ Jơ nŭm pơ gơ̆r kon pơ lei păng Dơ nŏ anĭh vei lăng kon pơ lei kăch mang dêh char Gia Lai đei man lơ̆m cham xă hlŏh 1 ha, hăm kơ sô̆ jên vă jê̆ 2 ti đơ̆ng jên vang tơ gop lơ̆m dôm khul grŭp, anĭh tĕch mơ dro.

Dơ̆ng: Tơ blơ̆