VOV4.Bahnar - Ƀlep ƀơ̆t tơ băt 46 sơ năm Năr rơ ngei tơ ring pơ băh, rơ ngei teh đak, Anih jang Đoàn dêh char Gia Lai hlôi pơ gơ̆r tơ drong jang lăng găh tơm a păng et hơ tŏk hơ nih soi gĭt kăl Đoàn hơ druh tơ dăm kon pơ lei kach mang dêh char Gia Lai jăl jang 1962-1975 tơ̆ plei Tăng Lăng (xăh Krong, apŭng Kbang). Đơ̆ng rŏng jơ nei đơ̆ng tơ drong vang iung tơ blăh sơ năm 1960, dêh char Gia Lai pơ jing tơ ring rơ ngei, pơm tơ drong ‘lơ̆ng ăn tơ drong jang hơ druh tơ dăm hơ ioh hơ tŏk tơ iung pran kơ tang. Blŭng sơ năm năm 1962, anih jang Đoàn dêh char đei pơ jing vă akŏm, pơ hrăm hơ druh tơ dăm kŏm iung tơ jră ayăt mơ̆t tơ gar.

Et hơ tŏk hơ nih soi gĭt kăl Đoàn hơ druh tơ dăm kon pơ lei kach mang dêh char Gia Lai

Băt dôm yơ jơ hnơr kang ƀô̆, đoàn viên, hơ druh tơ dăm hlôi plang hơ kâu, pham lĕch sĕch huŏng, sơ năm mơ lôh lơ̆m groi teh âu, tơ gop kŭm hăm đi đăng linh, đĭ đăng kon pơ lei rơ ngei dêh char. Vă đei dơ̆ng 1 hơ nih gĭt kăl pơ tho pơ hrăm joăt joe, Anih jang Đoàn dêh char hlôi krao hơ vơn rim kon jên ming man hơ nih soi gĭt kăl anih jang Đoàn hơ druh tơ dăm kon pơ lei kach mang dêh char Gia Lai tơ̆ xăh Krong. Tơ drong ming man lơ̆m teh să 2.000 mét vuông, hăm jên pơm hloh 600 triệu hlak jên.

Thuem: Tơ blơ̆