VOV4.Bahnar - Năr 12/3, tơ̆ tơring Hòa An, apŭng Phụng Hiệp, dêh char Hậu Giang, Kŏng ty Halcom Việt Nam hăm Grŭp jang Shizen Energy (Nhật Bản) pơgơ̆r pơm lê̆h et hơtŏk hnam kmăi ŭnh hơyŭh jơ̆ng ‘năr Hậu Giang. Ƀok Trần Thanh Mẫn, Kơdră chĕp pơgơ̆r T.Ư Mặt trận Tổ quốc Việt Nam vang năm. ‘Nau tơdrong jang ŭnh hơyŭh jơ̆ng ‘năr mă blŭng đei et hơtŏk, păng pơm tơlĕch ŭnh hơyŭh tơmơ̆t hơdoi hăm ŭnh hơyŭh tĕh đak tơ̆ tơring tơmăn đak kroong Cửu Long.

Kăt che et hơtŏk hnam kmăi

Hnam kmăi ŭnh hơyŭh jơ̆ng ‘năr Hậu Giang akŏp jên tơmơ̆t jang ‘noh 700 ti. Tơchĕng lơ̆m 1 sơnăm hnam kmăi au iŏk đei dang 80 ti hlak jên. ‘Nau tơdrong jang hnam kmăi ŭnh hơyŭh jơ̆ng ‘năr mă blŭng đei mơ̆t jang tơ̆ dêh char Hậu Giang, tơgop iŏk đei jơnei đơ̆ng jơ̆ng ‘năr tơ̆ Hậu Giang păng lăp hăm tơdrong atŏk tơ iung ŭnh hơyŭh rơgŏh ‘lơ̆ng tơ̆ Việt Nam ‘moi kiơ̆ tơdrong Tơchơ̆t 55-NQ/TW đơ̆ng Dơnŏ anih tơm Chĭnh trĭ adoi nhen trong pơ prŏ atŭm găh ŭnh hơyŭh mơ̆ng ‘năr tơ̆ Hậu Giang.

Tơblơ̆ nơ̆r: Amazưt