VOV4.Bahnar - Đơ̆ng rŏng lơ ‘măng pơdơ̆h kơ yuơ jĭ hơbŭh Covid-19, năr au, năr 7/1, Festival phe Việt Nam ‘măng mă V sơnăm 2021 gô đei pơgơ̆r tơ̆ Vĩnh Long kơ yuơ Trung ương Khŭl kon pơlei choh jang sa Việt Nam, Dơnŏ anĭh tơm vei lăng Chŏh jang sa păng Atŏk tơ iung tơring tơrang păng Dơnŏ anĭh vei lăng kon pơlei dêh char Vĩnh Long vang pơgơ̆r. Festival gô đei pơgơ̆r atŭm hăm khei ‘năr pơgơ̆r hop akom gĭt kăl nhen: Hop akŏm khoa hok găh tơ iung pơjing păng atŏk tơ iung tơmam drăm OCOP, rim ‘măng Pơgơ̆r phe ‘lơ̆ng hơnăn Việt, Jơnŭm kơchơ pơdă tơmam drăm atŏk tơ iung mŭk drăm-jŏh ayŏ-tơpôl kơ dêh char Vĩnh Long, Tơring tơmăn đak kroong Cửu Long păng rim dêh char, pơlei tơm lơ̆m tĕh đak. Tơ̆ hop akŏm, rim bơngai khoa hŏk, khŭl chĕp pơgơ̆r păng rim hơnĭh mơdro sa gô akŏm pơma dơnŭh tơchă dôm trong kăl hơmet pơ ‘lơ̆ng tơnap tap, yak hlŏh dôm tơdrong tơhlăk tơhlĭn vă yak trŭh ba phe ƀa Việt Nam atŏk tơ iung sơđơ̆ng lơ̆m tĕch mơdro tơ̆ tĕh đak păng tĕh đak đe.

Tơblơ̆ nơ̆r: Amazưt