VOV4.Bahnar - “GDP 2021 đei 2,58% noh đei jơnei keh kong; Tơchơ̆t 128 tơpă tơdrong tơgŭm hơmet pơm jang hơtŏk tơring tĕch răt; jên axong jang đơ̆ng teh đak đe tŏk lơ; Chư̆ng khoăn hơtŏk pran; Kơsô̆ pơkăp kơjă iŏk yua tŏk kơđeh hloh jô̆ đơ̆ng xơnăm 2016; Tĕch – răt tơmam hăm teh đak đe pơtoi tŏk pran”… Dôm kơtơ̆ng ang âu đei Anih tơm Chih hơlen, Anih tơm Axong jang xơkơ̆t lơ̆m tơdrong tơjrâ̆m tang măt ăn dôm anih chih hla bar tơroi, Tơbang kơsô̆ chih akŏm găh mŭk drăm – tơpôl Jăl 4 păng lơ̆m xơnăm 2021. 'Nguaih kơ noh, tơdrong jang mŭk drăm tơpôl 2021 đei minh ƀar kơtơ̆ng ang tơrĕk hloh nhen: jê̆ 160 rơbâu anih jang mŭk drăm vang jang lơ̆m tơring tĕch răt – tơjur pơtêng hăm xơnăm 2020; huach kư̆ kă mă kăl tŏk  0,81%. Đei 2 tơdrong hơtŏk tơjur kơtang noh tơmang pơhiơ̆ hăm kơsô̆ tơmoi đơ̆ng teh đak đe truh Việt Nam tơjur jê̆ 96%.

- Kiơ̆ đơ̆ng Dơnŏ anĭh tơm chĭh jô̆ tơbăt, sơnăm 2021, akŏp tĕch răt hăm tĕh đak đe iŏk đei hlŏh 668 ti 500 trĭu dolar, lơ̆m au tĕch tơ̆ teh đak đe iŏk đei 336 ti 250 trĭu dolar, tŏk 19% pơtêng hăm sơnăm 2020. Mă kăl, lơ̆m sơnăm 2021 đei 35 tơmam drăm tĕch mơdro tơ̆ tĕh đak đe iŏk đei hlŏh 1 ti dolar, tơmơ̆t 93,8% akŏp tĕch mơdro tơ̆ tĕh đak đe, lơ̆m au đei 8 tơmam drăm tĕch mơdro tơ̆ tĕh đak đe iŏk đei hlŏh 10 ti dolar, tơmơ̆t 69,7%. Sơnăm 2021 tơdrong mơdro sa hơnơ̆ng iŏk đei jơnei lơ hlŏh (4 ti dolar), tơbăt hơdăh sơnăm mă 6 hơnơ̆ng Việt Nam tĕch mơdro tơ̆ tĕh đak đe iŏk đei kơ jăp hlŏh lơ̆m khei ‘năr mơdro sa apŭng plĕnh tĕh đei răm kơtang tim lăh ƀô̆h kơ yuơ jĭ hơbŭh Covid 19. Tơdrong tŏk lơ kơ tĕch mơdro tơ̆ tĕh đak đe sơnăm 2021 ‘nŏh jing trong hơdăh ‘lơ̆ng ăn atŏk tơ iung mŭk drăm tĕh đak.

Tơblơ̆ nơ̆r: Lan-Amazưt