VOV4.Bahnar - Lơ̆m jăl khei mă I sơ năm 2021, Khul linh dăr joang tơ̆ trong gre dêh char Gia Lai chă ƀôh sek phak dôm jĭt khul grŭp, lơ bơ ngai pơm glăi găh tơ drong yak vih vât, chơ chuĕn, hăm kơ sô̆ jên phak hlŏh 300 triu.

Lơ̆m 3 khei blŭng sơ năm 2021, Khul dăr joang tơ̆ trong nơ năm Gia Lai sek phak hlŏh 300 triu hlak jên mưh pơm glăi tơ drong yak vih vât, chơ chuĕn

Mă hơ dăh, lơ̆m tơ drong dăr hơ len, sek phak mưh pơm glăi tơ drong vei sơ đơ̆ng tơ̆ trong nơ năm, khul dăr joang kơ Anĭh vei lăng trong nơ năm dêh char Gia Lai pơ gơ̆r hơ len năng 160 tŏ gre, sek phak jên 22 khul grŭp, 40 ‘nu bơ ngai hăm kơ sô̆ jên 209 triu, thu iŏk ƀăng huơ̆r gre kiơ̆ khei ‘năr pơ kăp hăm 9 ‘nu bơ ngai, thu iŏk hơ năn hăm 13 tŏ gre chơ chuĕn, athei yuih tơ jur 38,6 tân tơ mam.

Dôm tơ drong glăi mă lơ ‘nŏh jĭ chơ trăp hlŏh tơ drong, gre ưh đei chih hơ năn, hao mât lơ̆m trong kâm... Hăm gre chơ tơ moi, đei 20/46 tŏ gre đei dăr hơ len pơm glăi, hăm kơ sô̆ jên phak vă jê̆ 100 triu. Mă loi, ƀât têt Nguyên đán Tân Sửu, khul dăr joang sơng iŏk păng sek tơ lang 121 nơ̆r tơ roi đơ̆ng tơ moi găh tơ drong ưh gơ̆h tơ plih, iŏk hơ lơ̆k jên vĕ mưh gre ưh gơ̆h kơ dâu yao đơ̆ng jĭ Covid-19 tơ̆ dêh char.

Dơ̆ng: Tơ blơ̆