VOV4.Bahnar - Anih MTTQ Việt Nam dêh char Gia Lai ‘nao pơ gơ̆r hop akŏm pơ ma nuh ‘măng mă 3 vă chih măt dôm bơ ngai đei tôm tơ drong tơ găl lĕch pơ jei pơm bơ ngai tang măt Kuô̆k hô̆i jăl XV, bơ ngai tang măt Jơ nŭm pơ gơ̆r kon pơ lei dêh char Gia lai đơ̆ng 2021-2026.

Jơ bơ̆ jang lơ̆m Hop akŏm

Lơ̆m hop akŏm, đơ̆ng rŏng kơ pơ ma nuh đĭ đăng bơ ngai truh hop akŏm drơ̆ng nơ̆r chih măt 10 ‘nu bơ ngai lĕch pơ jei pơm tang măt Kuô̆k hô̆i jăl XV. Pơ têng hăm hop akŏm mă 2, hop akŏm mă âu đei 3 ‘nu bơ ngai apĭnh sut măt, ưh đei lĕch pơ jei pơm bơ ngai tang măt Kuô̆k hô̆i jăl XV. Hop akŏm pơ ma nuh ‘măng mă 3 kŭm chih hơ met 119 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char Gia Lai jăl XII, đơ̆ng 2021-2026.

Đơ̆ng rŏng hop akŏm pơ ma nuh ‘măng mă 3, Anih vei lăng pôk rơih dêh char Gia Lai chih hơ dăh măt 14 ‘nu bơ ngai lĕch pơ jei pơm bơ ngai tang măt Kuô̆k hô̆i jăl XV (lơ̆m nŏh đei 4 ‘nu bơ ngai đơ̆ng Trung ương păng 10 ‘nu bơ ngai tơ̆ tơ ring). Pơ gơ̆r 21 grŭp pôk rơih vă rơih 71/119 ‘nu bơ ngai pơ jei, pơm bơ ngai tang măt Jơ nŭm pơ gơ̆r kon pơ lei jơ̆p tơ ring jăl XII, đơ̆ng 2021 – 2026 hăm lơ tơ drong jang tôch rơ đăh.

Dơ̆ng: Tơ blơ̆