VOV4.Bahnar – Dang ei, dêh char Gia Lai đei 16 lơ̆m 17 tơdrong jang tŏk bŏk oei đei pơm jang, hăm kơsô̆ unh hơyuh vă pơm tơlĕch hloh 1200 MW, hăm kơsô̆ jên hloh 40 rơbâu tih hlj. Mă lei, tơdrong mă dôm tơ ‘ngla axong jang “kơdâu pơlong” pơm jang vă dăh tom pơm tơlĕch unh hơyuh hrôih adrol kơ năr 31/10/2021 vă đei yua kơjă pơkăp pơm jang đơ̆ng Khul kơpal teh đak, hlôi pơjing đei lơ tơdrong ưh kơ ‘lơ̆ng lơ̆m tơlĕch jang păng iŏk yua bơngai jang. Anih vei lăng kon pơlei dêh char Gia Lai ăn tơbăt, dêh char tŏk bŏk akŏm xek tơlang păng deh hrôih pơtôch lê̆ dôm tơdrong oei pơngơ̆t kơ đon âu.

Kiơ̆ tơdrong hơlen ăh jê̆ đĭ khei 4/2021 đơ̆ng Anih jang kŏng thương Gia Lai, dang ei, đei 16 lơ̆m 17 tơdrong jang pơm tơlĕch unh hơyuh đơ̆ng kial tơ̆ dêh char tŏk bŏk oei pơlăp, mă lei lơ tơ ‘ngla axong jang tam mă keh đang hla bar hô sơ thuê teh kiơ̆ tơchơ̆t lơ̆m Luơ̆t Hơgăt Teh. Hơdăh noh, đei minh ƀar tơdrong jang tơ̆ apŭng Kông Chro iŏk pơm jang tơ̆ tơring teh pơtăm ‘long bri. Ƀok Nguyễn Duy Lộc, Phŏ Kơdră Anih Kŏng thương Gia Lai ăn tơbăt, tơdrong tơm noh kơlih âu adoi jing tơdrong jang kăl pơkăp kơsô̆ 1, lơ̆m Anih Kŏng thương vei lăng. Ăh tơlĕch jang, dôm anih jang adrô̆ kăl tơroi ăn jơnŭm pơgơ̆r tơring tơ̆ apŭng đĕch, noh ăh năm hơlen tơpă ăh jê̆ đĭ khei 4/2021, anih jang kŏng thương pơtơm băt hơdăh. Hăm dôm tơdrong jang pơm tơlĕch unh hơyuh đơ̆ng kial tơ̆ tơring teh pơtăm ‘long bri, Anih jang gô pơkăp hơgăt teh âu pă đei oei lơ̆m teh vă pơtăm ‘long bri. Ƀok Nguyễn Duy Lộc, Phŏ Kơdră Anih Kŏng thương Gia Lai ăn tơbăt, anih jang tŏk bŏk oei jang atŭm hăm dôm anih jang nai păng tơ ‘ngla axong jang pơm tơlĕch unh hơyuh đơ̆ng kial vă hơmet pơkeh hla bar kăl kiơ̆ tơchơ̆t: “Dôm anih jang tơbang noh lơ̆m tơdrong tơlĕch jang, hô sơ apinh thuê teh tŏk bŏk oei hơlen xơkơ̆t, rim anih jang kơpal tŏk bŏk oei hơlen lăng. Anih jang Kŏng thương tŏk bŏk oei tơgŭm jang tơnăp ăn dêh char găh tơdrong âu. Kiơ̆ pơkăp pơm kiơ̆ ƀlep khôi luơ̆t, nhôn pơm trong hiôk ăn anih axong jang pơklaih tơnap tap, pơtruh tơtom dôm tơmam drăm kăl ăn tơdrong pơm jang, ưh kơ đei tơdrong mă pơm ‘mơ̆ng hăm khôi luơ̆t pơkăp ôh”

Tơdrong bang hơdăh nao tơ̆ dôm anih pơm tơlĕch unh hơyuh đơ̆ng kial dang ei noh tơdrong yua jê̆ 300 ‘nu bơngai jang teh đe (mă lơ noh bơngai Trung Quốc) tam mă đei hla bar axong pơm jang. Ƀok Nguyễn Văn Lộc – Phŏ Kơdră anih pơgơ̆r jang kơ Anih axong jang ăn Anih vei lăng kon pơlei dêh char Gia Lai ăn tơbăt, hlôi đei hla bar pơtruh đơ̆ng Anih vei lăng kon pơlei dêh char Gia Lai pơkăl minh ƀar anih jang akŏm xek tơlang tơnăp tơdrong mă âu. Hăm pơkăp noh, mưh anih jang mŭk drăm ưh đei keh đang hla bar hô sơ ăn bơngai jang teh đak đe kiơ̆ tơchơ̆t, tơring gô pơm kiơ̆ pơkăp tơpuh dôm bơngai jang ưh đei hla bar axong jang: “Dêh char pơgơ̆r dôm anih jang kơpal hơlen rim hô sơ, bơngai yơ ăh khei năr yơ, bơngai juăt jang găh kơ̆l ‘ngok dăh mă jang jơ̆ng ti vă tơlĕch dôm tơchơ̆t xek hrŭ tơdrong pơm yoch hanh chĭnh hăm bơngai jang păng anih jang mŭk drăm iŏk bơngai jang. Ưh đei tôm pơkăp noh athei tơpuh lê̆. Xơnong jang tơm tơ̆ âu noh găh vei lăng, hơlen hla bar axong pơm jang hăm bơngai jang noh Anih vei lăng Axong jang Linh jĭ rơka păng Tơpôl, tơpuh dăh mă ưh noh kŏng ang dêh char tơlĕch. Mă lei kơyuơ tơdrong âu tŏk bŏk oei đei hơmet hô sơ noh dôm anih jang hlôi đei hla bar apinh pơdui khei năr vă xek hơlen”

Lan chih păng pơre nơ̆r