VOV4.Bahnar - ‘Năr 31/3, Hnam pơ gang apŭng Ia Grai, dêh char Gia Lai bơ̆ jang kiơ̆ triong athei oei hơ drô̆ hăm 1 ‘nu tơ dăm kơ dâu klĕnh đơ̆ng anĭh oei hơ drô tơ̆ dêh char Lạng Sơn vih tơ̆ tơ ring. Kiơ̆ nơ̆r tơ roi đơ̆ng Anih vei lăng tơ drong jĭ jăn dêh char Gia Lai, ‘năr 14/3, tơ dăm âu hơ năn sư ‘nŏh Nguyễn Công Giá (rơ nĕh sơ năm 2000, oei tơ̆ plei Văn Yên, xăh Ia Yok, apŭng Ia Grai) đei ăn oei hơ drô̆ tơ̆ Quân đoàn Chi Lăng, dêh char Lạng Sơn.

Tơ̆ âu, sư đei iŏk set hơ len jĭ 1 ‘măng păng ưh đei pơ rang jĭ. Truh gơ măng 23/3, mă đơ̆ng tam mă đĭ năr ăn oei hơ drô̆ kiơ̆ tơ drong hơ găt mă lei ‘nhŏng Giá kơ dâu klĕnh đơ̆ng anih oei hơ drô̆, tang gre đơ̆ng Lạng Sơn vih tơ̆ anih gre dơ̆ng Mỹ Đình (Hà Nội), oei tơ̆ Hà Nội 2 năr, đang kơ ‘nŏh tang gre vih tơ̆ Gia Lai. Anih jang pơ gang apŭng Ia Grai pơ gơ̆r ăn Giá oei hơ drô̆, atŭm hăm ‘nŏh tơ roi ăn Anih vei lăng tơ drong jĭ jăn dêh char Gia Lai vă iŏk set hơ len pham.

Dơ̆ng: Tơ blơ̆