VOV4.Bahnar - Rim tơring lơ̆m dêh char Gia Lai tŏk bŏk kơrŭn jơhngơ̆m atŏk kơtang ơ̆ jang hơvơn pơrô̆ pôk rơ̆ih trŭh hăm rim tơring atăih yăih, tơgŭm ăn kon pơlei băt găh hơnăp jang kơ bơ̆n lơ̆m ‘măng pôk rơih trŭh au kơnh. 

Ƀok Nguyễn Đăng Chung, Kơdră chĕp pơgơ̆r Dơnŏ anĭh vei lăng kon pơlei tơring, Kơ iĕng kơdră Jơnŭm vei lăng kon pơlei tơring Đông, apŭng Kƀang, dêh char Gia Lai tơbăt, tơring hlôi dăr lăng, pơklep hơnăn bơngai tăh hla, adoi hơnơ̆ng tơroi tơbăt pơrô̆ pơrôp vă sơđơ̆ng ăn đĭ đăng bơngai tăh hla jei băt ngăl păng pơm kiơ̆ tôm hơnăp jang kơ bơ̆n:“ Trŭh dang ei găh tơdrong bơ̆ jang hơmet ăn pôk rơ̆ih kơdră tang măt Kuô̆k hô̆i jăl XV păng kơdră tang măt Jơnŭm vei lăng kon pơlei jăl jang 2021 – 2026 ‘nŏh nhôn bơ̆ jang ‘lơ̆ng ƀlep tơdrong tơchơ̆t. Bơ̆ jang chĭh hơnăn bơngai tăh hla ‘nŏh nhôn hlôi  đei hla bơar chĭh pơtrŭh athei kŏng ang tơring pơm tơm jang kiơ̆ hăm rim pơlei, trŭh dang ei lơ̆m tơring hlôi chĭh đang hơnăn kon pơlei tăh hla păng tŏk bŏk ăn kơdră vei lăng pơlei dăr lăng hơlen vă hoei lon bơngai ayơ păng sơđơ̆ng ăn tơdrong pơm tơm kơ dĭh hơnăp jang kơ bơngai tăh hla lơ̆m tơring”

Hăm tơring Đak Tơley, apŭng Mang yang, đei 80% măt bơngai kon pơlei ‘nŏh bơngai Bahnar, ƀar năr mĭnh ‘măng, kang ƀô̆ tơring hao gre bơbĭt, chĕp ăl loa chă rapor păng ƀơk ăn hla bơar pơrô̆ hơvơn ăn kon pơlei. Hla bơar chĭh tơbatw găh pôk rơ̆ih adoi nhen ƀăng brŏ đei chĭh, hrip hăm 2 nơ̆r Bahnar hăm nơ̆r Yuăn vă kon pơlei bônh hlô̆h vao. ‘Nhŏng Đinh Gôn-Kang ƀô̆ tơring Đak Tơley tơbăt:“Kon pơlei tơ̆ au năm jang đơ̆ng hrôih, tơ̆ kơsơ̆ brŏk dang 5-6 jơ mă trŭh tơ̆ hnam. Hmă hmă nhôn chă pơre hăm al loa đơ̆ng 5 jơ vă kon pơlei mơ̆ng. Tơroi tơbăt hăm nơ̆r kon kông ba hloi. Nhôn chă pơrô̆ pơrôp lơ lŏh kon pơlei ƀônh hlô̆h vao hơdăh hăm nơ̆r hơdrung bơ̆n”

Ƀok Đinh Đình Chi, Kơdră chĕp pơgơ̆r Dơnŏ anih vei lăng Jŏh ayŏ kơdŏ soang Kơtơ̆ng ang păng Pơre nơ̆r apŭng Kƀang tơbăt, hăm đei 46% măt bơngai kon pơlei lơ̆m apŭng ‘nŏh bơngai kon kông, tơdrong bơ̆ jang pơrô̆ pơrôp tơroi tơbăt ăn kon pơlei au hăm lơ trong jang, lăp hăm tơdrong oei sa joăt joe kơ kon pơlei. Mĭnh păh hơnĭh au pơrô̆ pơrôp tơroi tơbăt găh bơ̆ jang pôk rơih ‘moi kiơ̆ ăl loa brŏ, mă ƀar ‘nŏh iung năm tơ̆ rim pơlei chă pơgơ̆r jŏh ayŏ tơroi tơbăt hloi:“ Hăm dôm nơ̆r chĭh păng nơ̆r pơtho đơ̆ng Ban Tuyên giăo adoi nhen tơdrong pơrô̆ pơrôp đơ̆ng dơnŏ anih vei lăng pôk rơ̆ih, ‘nŏh hơnĭh au tŏk bok chă chhơ̆, in tơlĕch lơ̆m apŭng,lơ̆m thĭ trân hloi. Truh dang ei bơ̆ jang pơrô̆ pơrôp tơroi tơbăt hăm rup, che au to hlôi pơm keh đang  hlŏh 300m2 pa nô, áp phích. Pơjing tơdrong rapor au to tơroi tơbăt găh tơdrong pôk rơih. Khŭl jŏh hơri hlôi pơm pơkeh pơm tông vă akŏm lơ̆m tơdrong pơrô̆ pơrôp pôk rơih”.

Tơdrong pơrô̆ pơrôp tơroi tơbăt găh pôk rơ̆ih tơ̆ Gia Lai đei pơgơư̆r kiơ̆ lơ trong hăm bơ̆n um rup, nơ̆r hơvơn, iŏk yua lơ găh kmăi kmŏk pơre nơ̆r, lăng kơ jăp hăm tơdrong pơgơ̆r pơrô̆ pơrôp hăm nơ̆r ƀơ̆r đon. Atŏk kơtang pơrô̆ pơrôp lơ̆m tơring kon kông hăm nơ̆r Jrai, Bahnar ... Yă Phạm Thị Lan, Kơ iĕng Kơdră chĕp pơgơ̆r Dơnŏ anĭh MTTQ Việt Nam dêh char Gia Lai  sơkơ̆t hơdăh tơdrong iŏk đei jơnei đơ̆ng khŭl “pơrô̆ pơrôp hăm nơ̆r ƀơ̆r pơma” hlôi đei ƀô̆h hơdăh tơ̆ tơring atăih yăih:“ Mă kăl’nŏh dôm bơngai đei kon pơlei yom, rim kră pơlei, thôn trơng chă pơma nơ̆r kơ dĭh đe sư hloi nhen nơ̆r Jrai, Bahnar vă tơroi tơbăt ăn kon pơlei dôm tơdrong gĭt kăl găh tơdrong pôk rơ̆ih au. ‘Moi kiơ̆ tơdrong pơtho tơbăt au ‘nŏh găh lơ kon pơlei mă kăl bơngai kon kông hlôi rơih tăh hla ƀlep bơngai kơdră đei jơhngơ̆m đon ‘lơ̆ng, bơ̆ jang tơnăp , jang gơ̆h hơgei vă vang mơ̆t lơ̆m khul kơdră tang măt Jơnŭm vei lăng kon pơlei rim hơnih”

Năr pôk rơih Kuô̆k hô̆i jăl XV păng Jơnŭm vei lăng kon pơlei jăl jang 2021-2026 tŏk bŏk vă jê̆ trŭh. Bơngai tăh hla rim hơdrung oei tơ̆ Gia Lai tŏk bŏk hơmet đang gô chang sơng Năr pơm lê̆h tĭh au.

Bơngai chĭh: Hoàng Qui

Tơblơ̆ nơ̆r: Amazưt