VOV4.Bahnar - Khei năr au ki, rim tơring ‘moi kiơ̆ trong sơlam tĕh đak kơ dêh char Gia Lai hlôi atŏk kơtang bơ̆ jang pơrô̆ pơrôp tơroi tơbăt vă kon pơlei hlô̆h vao păng atŏk kơtang hơnăp jang kơ dĭh lơ̆m jơ ‘năr vang tăh hla pôk rơ̆ih kơdră tang măt Kuô̆k hô̆i jăl XV păng kơdră tang măt Jơnŭm vei lăng kon pơlei jăl jang 2021-2026.  Tơ̆ apŭng Chư Prông, tơdrong pơrô̆ pơrôp tơroi tơbă pôk rơ̆ih đei iung jang kiơ̆ ƀar nơ̆r: Nơ̆r Yuăn păng nơ̆r Jrai đei rapor lơ̆m ăl loa tơring. Hăm tơring kon pơlei oei răh rap, tơlĕch jang năm trŭh rim ŭnh hnam chă pơtho tơbăt ăn kon pơlei. Tơ̆ apŭng Đức Cơ, bơ̆ jang pơrô̆ pơrôp đei tơring tơlĕch jang lơ trong, tơring hlôi pơjing Khŭl pơrô̆ pơrôp. Rim giĕng, rim bơngai lơ̆m Khŭl bơ̆ jang chĭh iŏk dôm kơtơ̆ng ang đei ƀơm trŭh tơdrong pôk rơ̆ih vă rapor lơ̆m ăl loa tơring, tơgŭm ăn kon pơlei băt hơdăh bơngai đei hơnăn ăn pôk tơmơ̆t adoi nhen khei ‘năr vă pơgơ̆r pôk rơ̆ih.

Tơblơ̆ nơ̆r: Amazưt