VOV4.Bahnar -  Tơring hơnơ̆ng đei phang pơđang pơrăm, trŭh dang ei, kon pơlei oei tơ̆ pơlei K Te, tơring H’Bông, apŭng Chư Sê, dêh char Gia Lai hlôi sơđơ̆ng jang sa păng iŏk yua kơ jăp gơnơm đơ̆ng pơtăm ktao. Mĭnh lơ̆m dôm tơring phang pơđang hlŏh lơ̆m dêh char, dang ei hlôi jing mir kơtao iŏk yua kơ jăp, ‘lơ̆ng hlŏh, tơgŭm ăn kon pơlei jang sa đei iŏk yua lơ.

Đơ̆ng rŏng 5 sơnăm kŏh tĕch, lơ ŭnh hnam kon pơlei oei lơ̆m pơlei K Te chŏh ming tĕh vă pơtăm ‘nao

Tŏk bŏk lơ̆m pơyan phang, mă lei dôm mir kơtao pơlei K Te jing ‘lơ̆ng ƀlĭk ƀlăk, sơ̆ jĭ mĭnh groi tĕh phang pơđang, hơđang hơ ơ̆ hơ ă kơ tơring phang H’Bông, găh apŭng Chư Sê, dêh char Gia lai. ‘Nhŏng Rơ O Mân, oei lơ̆m pơlei K Te tŏk bŏk chŏh tĕh vă pơtăm kơtao ‘nao đơ̆ng rŏng pơtôch 5 sơnăm.  Rơ O Mân tơbăt, ŭnh hnam pơtăm 2 ha kơtao đơ̆ng sơnăm 2016 păng sơnăm ayơ jei kŏh iok đei 200 tân, păng tŏ sĕt hlŏh iŏk đei 50 trĭu hlak jên. Nhen pơyan kơtao au ki, kơ jă tĕch măt ƀiơ̆ kơna ŭnh hnam jang sa iŏk đei lơ hlŏh ƀar ‘măng.“ Sơ̆ bơ̆n pơtăm hơƀo, pơtăm ƀum ƀlang đei ‘măng đei đei ‘măng ư̆h kơ iŏk đei. Dang ei tơplĭh pơtăm kơtao ‘noh hăp jing ‘lơ̆ng, tĕch đei kon jên lơ ƀiơ̆ pơtêng hăm pơtăm ‘long pơtăm anai. Tơklăh pơ đĭ kon jên jang, 1 ha ŭnh hnam jang sa iok đei 50 trĭu hlak jên”

Lăng ƀô̆h kon pơlei pơtăm kơtao iŏk yua kơ jăp, ‘nhŏng RMah Loe, pơlei K Te jei hŏk pơhrăm, pơtăm hlŏh 2 ha 2 sao kơtao. Jing pơyan jang mă blŭng, oei mơ suơ̆l tim gan băt, mă lei kơtao ‘nhŏng Loe oei jing ‘lơ̆ng. ‘Nhŏng Rmăh Loe lăp đon hlŏh ‘nŏh ‘long kơtao lơ̆m mir ŭnh hnam kĕ krơ̆ng hăm phang pơđang.“ Pơtêng hăm rim ‘long pơtăm anai ‘nŏh pơtăm kơtao tôch kơ ‘lơ̆ng, tơring bơ̆n mă kăl ư̆h kơ măh đak tơruih, mă lei kơtao oei jing ‘lơ̆ng, kĕ krơ̆ng hăm phang pơđang. Tơdăh hơgăt tĕh ‘lơ̆ng lei lơ̆m mĭnh ‘măng pơtăm đei kŏh tĕch đơ̆ng 4 trŭh pơđăm sơnăm. Dang ei ba tŏk bŏk pơm hnam ‘nao păng gô răt rơmo vă rong yŏng tơdăh tĕch kơtao au đei iŏk yua kơ jăp”

‘Long pơtăm ư̆h kơ jing ‘lơ̆ng tơ̆ tơring phang pơđang H’Bông dang ei hlôi đei tơplĭh hăm kơtao, hơnhăk đei iŏk yua kơ jăp

Ƀok Siu Loan, thôn trương pơlei au tơbăt, K Te jing tơring mơmat tat hloh hăm hlŏh 300 ŭnh hnam bơngai Jrai. Lơ̆m 5 sơnăm kơ au, lơ ŭnh hnam lơ̆m pơlei hlôi tơplĭh rim ‘long pơtăm anai, iŏk yua ư̆h kơ jăp ‘nŏh pơtăm kơtao. Đei tơdrong tơgŭm djru đơ̆ng kơdră tơring, kon pơlei tơ̆ au đei pơtho ăn trong chŏh tĕh, hơdrĕch kơtao, kih thuơ̆t păng đei hơnĭh mơdro sa răt iŏk pơ đĭ hloi.“Sơ̆ kon pơlei jei pơtăm kơtao ră mă lei vei lăng ư̆h gan tơnăp kơna iŏk yua ư̆h kơ lơ, đơ̆ng rŏng au đei ŭnh hnam pơtăm kơtao, đơ̆ng ŭnh hnam dơnŭh hlôi jing ŭnh hnam đei ƀô̆h. Hơnơ̆ng ‘mĕh vă tĕh đak chă tơgŭm djru ăn dôm tơring đak ư̆h kơ măh ‘nŏh ăn asong sir đak koai koer vă bu bu jei pơtăm kơtao ngăl. Tơ̆ pơlei K Te lăp hơdrô̆ kơtao ‘nŏh mă jing ‘lơ̆ng”.

Ƀok Phạm Công Viên, Kơdră chĕp pơgơ̆r Dơnŏ anĭh vei lăng kon pơlei tơring H’Bông tơbăt, mir pơgar kơtao tơ̆ pơlei K Te đei hlŏh 60 ŭnh hnam vang pơtăm hăm hloh 100 ha. Xơkơ̆t hơdăh kơtao ‘nŏh ‘long pơtăm tơm, kơdră chĕp pơgơ̆r tơring H’Bông hơnơ̆ng chă pơrô̆ hơvơn kon pơlei tơplĭh mir pơgar ‘long pơtăm anai chă pơtăm kơtao, ƀrư̆ ƀrư̆ tơgŭm ăn kon pơlei jang sa iŏk yua kơ jăp, yak hlŏh dơnŭh hin.“ Pơlei K Te đei tơdrong hơ iă ‘nŏh kon pơlei hŏk kiơ̆ ƀônh khao hŏk kih thuơ̆t pơtêng hăm rim pơlei anai, pơlei oei tơ jê̆ hơnĭh bơ̆ jang tơring, kon pơlei đei tĕh jang sa să păng rơvơn vă chă pơtăm kơtao. Mư̆h nhôn tơlĕch jang tơ̆ pơlei K Te đei jơnei ‘nŏh gô tơlĕch jang kiơ̆ tơ̆ rim pơlei ”

Đơ̆ng năr pơtăm kơtao, tơdrong erĭh sa kơ kon pơlei bơngai Jrai oei tơ̆ pơlei K Te hlôi jing phĭ tơnŏ dơnŏ ‘lơ̆ng hlŏh dơ̆ng. Groi tĕh rang rar phang pơđang au sơ̆ hlôi jing mir pơgar jơk ƀlĭk, tơgŭm ăn tơdrong hơdrin yak hlŏh dơnŭh hin đơ̆ng kon pơlei tơring phang pơđang iŏk đei kơ jăp.

Bơngai chĭh: Hoàng Qui

Tơblơ̆ nơ̆r: Amazưt