VOV4.Bahnar – Hloh 34 ha bri hmŏ tơ̆ Tơring bri 1065 yuơ Anih vei lăng kon pơlei xăh H’Bông, apŭng Chư Sê, dêh char Gia Lai vei lăng ƀơm phă pơrăm, chôk phă đơ̆ng khei 3/2021 truh blŭng khei 9/2021.Truh kơ 34 ƀơm phă pơrăm pơđĭ, 23 ha lơ̆m noh hlôi pơtăm ‘long ƀăch đan, noh khul kơpal kơ apŭng pơtơm ƀôh băt, tang găn. Tơdrong tơgar bri hli hlơt âu ưh adrô̆ ăn ƀôh tơdrong khŏnh kơnê̆ đơ̆ng dôm bơngai tơtông, mă oei tơôh tơdrong tơhlăk tăk lơ̆m tơdrong pơjao bri, vei lăng bri tơ̆ tơring.

Tơdrong đei ƀôh tơ̆ dôm tơring pơkăp 1, 2 păng 4, Tơring bri 1065, bri hmŏ lơ̆m pơkăp vei lăng kơ Anih vei lăng kon pơlei xăh H’Bông, apŭng Chư Sê.

Tơ̆ anih muih choh, dôm bơngai tơtông hlôi bơ̆ hơdrơ̆n pơk hăm tôm tơmam yua păng kơmăi kơmŏk pơtruh vă muih choh bro, pơtăm hloh 23 ha ƀăch đan, 11 ha nai hlôi đei pơ ‘nguaih vă pơtăm ‘long bri. Yă Rmah H’Bé Nét- Kơdră Anih vei lăng kon pơlei apŭng Chư Sê, dêh char Gia Lai ăn tơbăt, dôm anih jang kơpal kơ apŭng xơkơ̆t, tơdrong tơgar bri hmŏ hli hlơt âu đei ƀôh lơ̆m tong anê̆ xơnăm đơ̆ng khei 3 truh khei 9/2021, khei năr mă tôm anih jang chĭnh trĭ tơ̆ tơring akŏm jang tơjră pơrang jĭ: “Xơnăm 2021, apŭng Chư Sê đei hơbuh pơrang jĭ COVID-19. Xăh H’Bông đei 1 thôn athei pơkăp pơvei, noh tôm anih jang chĭnh trĭ akŏm lơ̆m tơdrong jang tơjră pơrang jĭ, khul jang tŏ xĕt, hơlen kơ jâ̆p tôm. Kơyuơ noh đei hê̆ tơdrong mă âu, nhôn ƀôh adoi pơngơ̆t kơ đon”

Atŭm hăm tơdrong tơm kơtă âu, ƀok Bùi Văn Cường- Phŏ Kơdră Anih vei lăng kon pơlei xăh H’Bông, apŭng Chư Sê akhan, oei đei dôm tơdrong pơngơ̆t kơ đon lơ̆m tơdrong pơjao bri. Ƀok Cường ăn tơbăt, đơ̆ng tong anê̆ xơnăm 2019, ăh mă Jơnŭm vei hơlen Bri hmŏ Ayun Pa tơklăh, tơring đei pơjao ăn hloh 3.800 ha bri, lơ̆m noh hloh 2.100 ha noh bri hmŏ mă lei ưh đei tơmam drăm păng khul juăt jang vă iŏk xơnong jang. Tơring bri kơ tơring noh bri tơkuh hăm 2 apŭng Phú Thiện păng Mang Yang, duh pơm ăn tơdrong vei lăng bri ƀơm lơ tơnap tap: “Đơ̆ng rŏng xăh H’Bông iŏk vei tơring bri âu noh đei lơ tơnap tap nhen găn trong đak krong, dăh mă găn 2 apŭng Phú Thiện, Ia Pa, bô̆k vih noh pơhlom 100 km. Anih vei lăng kon pơlei xăh ưh đei khul juăt jang nhen găh anih jang vei bri ôh”

Tơrĕk truh tơdrong pơrăm bri âu, ƀok Thái Thượng Hải, Kơdră Anih vei lăng bri apŭng Chư Sê ăn tơbăt, anih jang tŏk bŏk oei hơlen, chih hơdăh dôm bơngai pơrăm bri âu: “Tơdrong mă âu ƀôh kơnê̆ tơpă, noh Anih jang vei bri hlôi atŭm hăm anih jang kơpal nhen anih kanh sat hơlen, Anih hơlen tơdrong glăi lơ̆m tơpôl chă hơlen băt tơ̆ tơring. Mă blŭng duh krao akŏm dôm bơngai âu, iŏk nơ̆r tơroi vă xơkơ̆t tơdrong tơm pơm đei tơdrong âu. Hăm hơgăt bri ƀơm muih choh, pơrăm xă, mă kăl âu jing bri hmŏ, noh Anih jang hơlen bri pơkăp khŏm mă hơlen hơdăh, chơ chă dôm bơngai muih choh vă xek tơlang trŏ ƀlep nhen khôi luơ̆t pơkăp”.

Atŭm hăm tơdrong pơgơ̆r jang hơlen kăp gĭt, pơm hơdăh tơdrong, Anih vei lăng kon pơlei apŭng Chư Sê duh hlôi tơroi tơdrong đei ƀôh truh Anih vei lăng kon pơlei dêh char Gia Lai, Anih Choh jang xa păng Hơtŏk tơring pơxĕl dêh char, pơtruh nơ̆r pơjao bri hmŏ ăn tơ̆ tơring ăn dôm anih juăt jang, vă tơdrong jang vei lăng bri gơh đei jơnei tơnăp hloh.

Lan chih păng pơre nơ̆r