VOV4.Bahnar - Anih jang Kanh sat mŭk drăm ( Kŏng an dêh char Gia Lai) jang hơ dai hăm rim khŭl linh kơ pal kơ apŭng Kbang, Gia Lai ‘nao chă ƀôh dơ̆ng 1 anih jang mơ dro sa pơ jing kơ dih đei dôm jĭt met khô̆i ‘long ư̆h kơ băt hơ dăh đơ̆ng yơ. Tơ drong kăl kơ tơ roi, yua kơ tơ ‘ngla anih jang mơ dro sa ư̆h kơ jang hơ dai, kơ na hiong lơ năr, khŭl jang kơ pal ‘nao pơ gơ̆r hơ len lăng đei hơ nih mong răk ‘long. Pơ gê ‘năr 15/7, tơ ‘ngla hơ nih mong răk pơ̆ih ‘măng, khŭl jang kơ pal hlôi pơ gơ̆r hơ len lăng, chă ƀôh yak blŭng dang 18 m3 ‘long, lơ kơ loăi.

Hloh 24 jơ kiơ̆ tơ drong hơ găt, tơ ‘ngla anih jang mơ dro sa ư̆h kơ tơ roi tơ băt hơ dăh đei tơm a ‘long păng hla ar pơ kăp ƀơm truh. Tơ drong ư̆h kơ ê ‘noh jĭ, lơ̆m kơ plăh khŭl jang kơ pal tŏk bŏk jô̆ hơ len ‘long, đei 7 ‘nu drŏ nglo tơ chă truh, drơ̆ng khan kơ dih gơ̆ih kơ sô̆ ‘long âu lơ̆m hơ nih mong răk kơ anih jang mơ dro sa Mai Hồng. Dang ei, khŭl linh kŏng an dêh char Gia Lai păng kŏng an apŭng Kbang tŏk bŏk hơ nơ̆ng dăr hơ len, pơm hơ dăh tơ drong. Mĭnh kơ sô̆ ‘long lơ̆m tơ drong ‘nâu hlôi đei chơ vih tơ̆ anih jang vei lăng bri ‘long apŭng Kbang gô sek tơ lang pơ ‘lơ̆ng.

Thuem: Tơ blơ̆