VOV4.Bahnar - Đơ̆ng rŏng lơ năr ưh kơ đei bơ ngai jĭ ‘nao, pơ gê ‘năr 26/9, tơ̆ Gia Lai đei 17 ‘nu jĭ COVID-19 ‘nao lơ̆m tơ pôl. Lơ̆m noh đei 15 ‘nu tơ̆ pơ lei tơm Pleiku păng 2 ‘nu tơ̆ apŭng Đăk Đoa. Mă hơ dăh ‘noh, tơ̆ pơ lei tơm  Pleiku, 15 ‘nu bơ ngai jĭ tă kơ ƀơm truh hơ nih jĭ tổ 11, phường Hoa Lư. Dang ei, CDC Gia Lai hlôi tơ chă đei 22 ‘nu F1, 26 ‘nu F2 ƀơm truh hơ nih đei lơ bơ ngai jĭ âu. Kăl kơ lăng truh, 2 ‘nu jĭ ‘nao đei ƀôh tơ̆ apŭng Đắk Đoa tă kơ brŏk đơ̆ng pơ lei tơm Hồ Chí Minh lơ̆m gơ măng ‘năr 21/9 hăm gre ô tô kơ dih, mă lei ưh kơ tơ roi tơ păt ăn khŭl jang pơ gang vă klĕnh ăn oei hơ drô̆ akŏm. Ƀơ̆t tơ roi tơ̆ hnam pơ gang xăh ADơk, apŭng Đăk Đoa, khŭl kơ dră tơ ring hlôi tơ lĕch tơ drong tơ chơ̆t ăn oei hơ drô̆ tơ̆ hnam đơ̆ng ‘năr 25/9, mă lei pơ đĭ 2 ‘nu ưh kơ pơm kiơ̆ tơ păt, oei năm vih vơ̆t lơ hơ nih lơ̆m pơ lei tơm Pleiku păng apŭng Đăk Đoa.

Thuem: Tơ blơ̆