VOV4.Bahnar - Lơ̆m ‘năr 24/6, kiơ̆ đơ̆ng iŏk pham hơ len lăng tơ̆ hơ nih ăn oei hơ drô̆, Anih vei lăng tơ drong jĭ jăn dêh char Gia Lai đei dơ̆ng 2 ‘nu đei ƀôh yŏng jĭ SARS-COV-2 ‘măng mă 1, oei hơ dai tơ̆ plei Yon Tok, xăh Ia Glai, apŭng Chư Sê. 2 ‘nu âu đơ̆ng Bình Dương brŏk tơ̆ Gia Lai hơ dai hăm bơ ngai jĭ kơ sô̆ BN13486. Hơ len lăng pham ‘măng mă 1 lơ̆m ‘năr 21/6 ư̆h kơ đei ƀôh yŏng jĭ SARS-COV-2; hơ len lăng ‘măng mă 2 lơ̆m ‘năr 24/6 đei ƀôh yŏng jĭ SARS-COV-2. Dang ei jơ hngơ̆m jăn 2 ‘nu jĭ âu hmă, pơ ma dơ nuh ‘lơ̆ng, ư̆h kơ hiĕn, yuh păng tŏk bŏk đei hơ nơ̆ng hơ len lăng. Ƀơm truh 2 ‘nu tơ poh jĭ âu, rim anih jang kơ pal dêh char Gia Lai hlôi iŏk pham hơ len lăng 6 ‘nu F1 tơ̆ dôm apŭng Chư Sê, Phú Thiện păng Krông Pa. Dang ei dôm pham hơ len lăng đơ̆ng apŭng Chư Sê, apŭng Phú Thiện hlôi ư̆h kơ ƀôh yŏng jĭ. Tŭn pran tang găn jĭ Covid-19, dêh char Gia Lai kŭm tŏk bŏk sơng iŏk păng jang kiơ̆ ăn oei hơ drô̆ akŏm 449 ‘nu, lơ̆m noh đei 400 ‘nu lơ̆m teh đak păng 49 ‘nu đơ̆ng teh đak đe.

Thuem: Tơ blơ̆