VOV4.Bahnar – Mă răm đơ̆ng pơrang jĭ Covid-19, mă lei lơ̆m 6 khei blŭng xơnăm 2021, tơdrong hơtŏk mŭk drăm tơ̆ Gia Lai duh oei đei jơnei 9,7%, tŏk hloh 1 'măng pơtêng hăm khei năr âu xơnăm xơ̆. Kơtơ̆ng ang âu đei tơbang lơ̆m 'măng pơtơm hop akŏm mă 2, jăl xơnăm 2021-2026 đơ̆ng Hô̆i đŏng kon pơlei dêh char Gia Lai, pơgơ̆r ăh pơgê năr (9/8) tơ̆ plei tơm Pleiku. Kiơ̆ tơroi lơ̆m 'măng hop akŏm, hăm akŏp tơmam drăm lơ̆m tơring đei 9,7%, tơdrong hơtŏk mŭk drăm 6 khei blŭng xơnăm 2021 kơ Gia Lai tŏk hloh 2 'măng pơtêng hăm khei năr âu xơnăm 2020. Duh lơ̆m 6 khei, dêh char pơm jang hrơ̆p minh 'măng dôm trong jang tang găn păng tơjră pơrang jĭ Covid-19 hơbuh hli, tơpoh lang xă lơ̆m tơpôl, ƀet vaccine bơ̆ng jĭ Covid-19 ăn hloh 47.800 'nu bơngai mă axong ƀet adrol hloh. 'Măng hop akŏm mă 2, jăl jang 2021-2026, Hô̆i đŏng kon pơlei dêh char Gia Lai gô vă pơgơ̆r lơ̆m năr 9 păng 10/8, gô hơlen, pơma đam 12 tơdrong tơbang păng chih akŏm tơchơ̆t. Lơ̆m noh, tơdrong pơkăl hơmet Tơchơ̆t kơsô̆ 100 đơ̆ng Hô̆i đŏng kon pơlei găh hơlen, hơmet pơkăp 3 kơloăi bri (jăl xơnăm 2025-2030), tŏk bŏk oei hơvơn lơ tơdrong tơrĕk hloh.

Lan chih păng pơre nơ̆r