VOV4.Bahnar – Dang ei, tơ̆ dêh char Gia Lai đei hloh 468.000 ha bri đei kla jên vei bri ăn dôm anih iŏk pơkăp vei bri. Tơpă ăn ƀôh, pơkăp kla jên vei bri ăn tơpôl kon pơlei hlôi đei jơnei lơ̆m tơdrong jang vei bri tơ̆ Gia Lai, tơgŭm kon pơlei dar deh tơplih trong juăt, tang găn tơgar truh tơ̆ bri.

Kiơ̆ axong jang đơ̆ng pơlei Kon Chrah, ăh tong anê̆ khei 11/2021 âu, ƀok Băk păng 2 unh hnam nai atŭm hăm đe kang ƀô̆ Jơnŭm vei lăng Bri hmŏ H’ra (xăh H’ra, apŭng Mang Yang) chă hơlen tơ̆ hơgăt hloh 950 ha bri đei pơjao vei lăng. Ƀok Băk ăn tơbăt, rim ‘măng năm hơlen noh đĭ 2 măng năr. Mưh nhen adrol ki, kon pơlei tơ̆ âu koh ‘long bri vă bơ̆ hnam, dăh mă muih choh bri pơm mir; noh dang ei kon pơlei Kon Chrah gô atŭm vei bri, păng đei kla jên 400.000 hlj 1 ha 1 xơnăm. Axong noh rim unh hnam đei 9 trĭu 500 rơbâu hlj rim xơnăm đơ̆ng tơdrong pơjao vei lăng bri. ‘Nâu jing jên xơđơ̆ng tơgŭm kon pơlei hơmet tơdrong erih. Ƀok Băk ăn tơbăt: “Lơ̆m pơlei, nhôn duh tơroi tơbăt lơ. Bri teh đak pơjao ăn kơ nhôn, noh pơlei ưh gơh phă bri, ưh gơh muih xoh bri pơm mir kư̆ kă. Mưh ƀôh jang mir ôr, nhôn tơroi hăm anih jang hloi. 6 khei, teh đak axong jên minh ‘măng, noh nhôn duh da ƀiơ̆, xut pơngot, tơjur hin dơnuh”.

Ƀok Nguyễn Văn Chín, Kơdră Jơnŭm jang vei bri hmŏ H’ra, apŭng Mang Yang ăn tơbăt, hơgăt teh ‘long bri đei anih jang pơjao vei lăng noh hloh 13.800 ha, lơ̆m noh đei hloh 10.400 ha bri hon kơdih. Bri tơ̆ âu đei lơ tơ̆r, lơ tơm ‘long kăp gĭt. Bri tơjê̆ hăm Jăl trong 19, tơjê̆ hăm mir ƀa kon pơlei noh tơdrong jang vei bri ƀơm lơ tơnap tap. Mă lei, đơ̆ng mă pơm kiơ̆ pơjao hloh 6.400 ha bri ăn 376 unh hnam kon pơlei, mă lơ noh kon pơlei  Bahnar tơ̆ 12 pơlei erih tơjê̆ bri, noh tơdrong vei lăng bri đei hơtŏk hơdăh: “Lơ̆m tơdrong vei lăng bri, gơnơm lơ̆m kon pơlei mă tơm. Mă ƀar noh hơtŏk tơroi tơbăt, hơvơn hơlêm; pơm kiơ̆ tơnăp xơnong kơ bơngai đei kơdrưh lơ̆m tơpôl vă chă tơroi hơvơn kon pơlei. Lơ xơnăm kơ âu, lơ̆m tơring nhôn ưh đei tơdrong chă tơgar teh bri. Nhôn vei lăng bri, vei lăng kơjăp xơđơ̆ng. Kiơ̆ dôm ‘măng chă hơlen, hơgăt bri nhôn vei lăng ưh đei tơjur”.

Ƀok Nguyễn Xuân Thưởng – Phŏ Kơdră Anih mong jên Vei lăng păng Hơtŏk bri dêh char Gia Lai ăn tơbăt, xơnăm 2021, dêh char Gia Lai đei hloh 468.700 ha bri đei kla jên vei lăng bri. Lơ̆m kơsô̆ noh, đei 123.000 ha bri đei pơjao ăn hloh 10.600 unh hnam kon pơlei tơ̆ tơring, mă lơ noh kon pơlei Jrai, Bahnar erih tơjê̆ bri vă vei lăng. Tơdrong kla jên pơkăp vei lăng bri jing kăp gĭt hăm kon pơlei tơ̆ tơring, kơlih âu jing jên xơđơ̆ng vă kon pơlei răt hơdrĕch ‘long pơtăm, tơmam choh jang, axong jang đei yua lơ găh choh pơtăm. Ăh tơdrong erih kon pơlei đei hơtŏk, noh gô tơjur ƀiơ̆ tơdrong gơnơm lơ̆m bri, tơgop vei xơđơ̆ng bri: “Hloh 10.600 ‘nu kon pơlei atŭm vei lăng bri, noh mưh đei phă bri pơm mir noh đe ƀôh tenh hloh. Tôm kon pơlei erih tơjê̆ bri, mă kăl noh bơngai kon kông adoi đei yua đơ̆ng pơkăp vei lăng bri. Đơ̆ng đei yua, đe ƀôh xơnong kăp gĭt đơ̆ng bri. Vei xơđơ̆ng bri, noh đei xa jên, pơm jang tơ̆ hơla bri, pơm pơdrŏng đơ̆ng bri. Tơdrong đei jơnei thoi noh pơtơm tơplih đei đon kơchĕng tơnăp”.

 Tơpă ăn ƀôh đơ̆ng Gia Lai hlôi xơkơ̆t trŏ trong đơ̆ng pơkăp kla jên vei lăng bri; tơdrong vei bri ‘meh đei jơnei athei gơnơm lơ̆m kon pơlei, pơyua ăn kon pơlei erih tơguăt hăm bri.