VOV4.Bahnar - Kiơ̆ tơ chơ̆t kơ sô̆ 596 đơ̆ng Anih vei lăng kon pơ lei dêh char Gia Lai, đơ̆ng ‘năr 20/9 truh dang ei, vă jê̆ 14 rơ bâu ‘nu kon pơ lei tơ ƀơ̆p mơ mat tat yua kơ ƀơm kơ nê̆ đơ̆ng Covid-19 đei iŏk phe tơ gŭm đơ̆ng khŭl kơ dră teh đak. Đăk Đoa jĭ 1 lơ̆m dôm apŭng mă blŭng kơ dêh char Gia Lai đei tơ lĕch asong phe vă tơ gŭm kon pơ lei tŏk bŏk tơ ƀơ̆p mơ mat tat yua đơ̆ng jĭ  Covid – 19, đơ̆ng ‘năr 20/9. Truh dang ei, Anih mong răk teh đak tơ ring găh tu Tây Nguyên hlôi chơ phe truh 8 xăh, thị trấn kơ apŭng păng tơ drong asong phe tŏk bŏk đei pơ gơ̆r. Vă phe tơ gŭm truh tơ tom păng ƀlep bơ ngai, hơ dai hăm vei sơ đơ̆ng tang găn jĭ, rim pơ lei, tơ ring hlôi hơ met bơ ngai jang, hơ met ăn asong phe mă lăp, hơ dai hăm tơ roi tơ băt hơ dăh truh rim unh hnam kon pơ lei. Kiơ̆ klăih song đơ̆ng khŭl kơ dră teh đak, lơ̆m ‘măng âu Gia Lai đei asong hloh 200 tấn phe, vă tơ gŭm ăn hloh 3300 unh hnam hăm vă jê̆ 14 rơ bâu ‘nu bơ ngai tơ̆ 10 apŭng. 1 ‘nu đei tơ gŭm 15 kĭ phe lơ̆m 1 khei.

Thuem: Tơ blơ̆