VOV4.Bahnar - Dôm hnam trưng THPT tơ̆ dêh char Gia Lai hlôi jang kĕh rim tơ drong vă pơm ‘lơ̆ng ăn ‘măng thi tốt nghiệp THPT tĕh đak gơ̆h pơ gơ̆r sơ đơ̆ng ‘lơ̆ng ƀât mă jĭ Covid – 19 oei tơ pŏh tôch hơ mơt hrei ‘nâu.

Tơ̆ Hnam trưng THPT Nguyễn Bỉm Khiêm, thĭ trơ̆n Chư Sê, apŭng Chư Sê, dêh char Gia Lai, đe hŏk tro lăm 12 oei hăt ôn hơ met ƀai păng pơm pơ kĕh dôm đe thi pơ long năng. Đe thây kô tơ̆ hnam trưng THPT Nguyễn Bỉnh Khiêm oei pơ tho tơ ƀôh jơ hngâm đon sơ đơ̆ng ăn đe ŏh vă pơm ƀai thi gơ̆h hlŏh. Kô Trần Thị Hồng Uyên, kô pơ tho ôn thi môn Ngữ Văn, hnam trưng THPT Nguyễn Bỉnh Khiêm ăn tơ băt:

“Lơ̆m jơ năr hŏk pơ hrăm păng pơ tho, thây kô kŭm hăm hŏk tro nhôn pơm kiơ̆ ‘lơ̆ng dôm trong tang găn jĭ kiơ̆ trong 5K, đĭ đăng hŏk tro vang hŏk gom muh măt, ôp ti hăm đak pơ gang ngăl. Lơ̆m khei ‘năr jĭ oei tôch hơ mơt hrei ‘nâu, tơ drong pơ tho pơ hrăm ăn đe ŏh kŭm ưh gan ‘lơ̆ng, yoa ƀơm ưh ‘lơ̆ng đơ̆ng sơ năm sơ̆ truh sơ năm ‘nâu. Thây kô, hŏk tro, hnam trơng vang jang hơ doi hăm dôm khul grŭp pơ gơ̆r ôn thi tơ păt ‘lơ̆ng, pơ lung mĕ ƀă, tơ tă ăn kon hơ ‘lơ̆p vang năm ôn ƀai mă tôm”

Hŏk tro pơm kiơ̆ ‘lơ̆ng tơ drong gom muh măt păng ôp ti hăm đak pơ gang mưh năm ôn thi

 Tơ drong thi sơ năm ‘nâu, Hnam trưng THPT Nguyễn Bỉnh Khiêm (apŭng Chư Sê) đei pơm hơ met 23 lăm thi hăm hlŏh 300 ‘nu hŏk tro vang thi. Kiơ̆ thây Nguyễn Hải Hà –Hiêu trơng Hnam trưng THPT Nguyễn Bỉnh Khiêm, đơ̆ng rŏng kơ Anih vei lăng pơ tho pơ hrăm dêh char Gia Lai chih hơ năn, hnam trơng hlôi hơ met ming lăm thi mă lăp. Găh nŏh dơ̆ng, hnam trưng kơ chăng hơ met tôm đak pơ gang ôp ti, che gom, kơ măy pơ tŏ hơ yuh hơ kâu... vă tang găn ‘lơ̆ng tơ drong jĭ Covid-19 lơ̆m pơ yan thi.

“Tơ dăh đei hŏk tro F1, F2, ‘nŏh athei tơ roi hloi ăn anih vei lăng pơ tho pơ hrăm. Anih vei lăng pơ tho pơ hrăm đei nơ̆r hơ găt athei chih tơ roi jơ hngâm jăn adrol kơ thi 7 năr vă gơ̆h băt hơ dăh tơ drong tơ ƀâp, pơ ma nuh đơ̆ng hŏk tro, thây kô lăng thi. Kơ dră chĕp kơ̆l Anih vei lăng pơ tho pơ hrăm dêh char oei pơ jao, tơ dăh lê̆ đei bơ ngai tơ ƀâp hăm F0, F1 ‘nŏh hnam trưng athei chĭu pŭ, vă pơm thoi yơ tơ drong thi tốt nghiệp THPT đei pơ gơ̆r tơ păt ‘lơ̆ng.”

Ƀok thây Trần Văn Lượng, hiê̆u trơng Hnam trưng THPT Tôn Đức Thắng, apŭng Đức Cơ ăn tơ băt, ‘măng thi THPT sơ năm ‘nâu ‘ngoăih kơ tơ drong bơ̆ jang ‘lơ̆ng tơ drong tang găn jĭ păng ôn ƀai ăn hŏk tro, hnam trưng oei tơ gŭm ăn hŏk tro đei tơ drong arih xa mơ mat tat vă đe ŏh gơ̆h năm thi hiôk hian, sơ đơ̆ng ‘lơ̆ng lơ̆m pơ yan thi truh âu kơnh:

“Hnam trưng vă pơ gơ̆r thi THPT kiơ̆ 2 trong, tơ dăh tơ drong jĭ oei đei nhen hrei ‘nâu ‘nŏh hnam trưng pơ gơ̆r ôn ƀai kơ tă tơ̆ hnam trưng. Dôm môn hŏk tro ôn thi thây kô athei chih tơ lĕch hla ar mă lăp. Tơ dăh jĭ krê hlŏh dơ̆ng ‘nŏh thây kô vă in kơ sơ̆p hla ar ôn gơih ăn hŏk tro hŏk kiơ̆ nơ̆r pơ tho đơ̆ng Anih vei lăng pơ tho pơ hrăm dêh char. Hŏk tro bơ ngai kon kông tơ̆ hnam trưng tôch lơ, jên mơ mat tat, hnam trưng athei gơih dôm hla ar ôn ‘nŏh ăn đe ŏh hăm jên đơ̆ng hnam trưng tơ gŭm vă hŏk tro da ƀiơ̆ hiong huach kon jên”

‘Măng thi sơ năm ‘nâu lơ̆m dêh char Gia Lai đei hlŏh 14.000 ‘nu hŏk tro chih măt vang thi hăm 39 anih thi tơ pă păng 17 anih thi đei hơ met hiă tơ̆ 17 apŭng, thĭ xăh, plt, hăm 616 lăm thi. Tơ chĕng adrol gô đei 1282 ‘nu kăn ƀô̆ lăng thi, 20 ‘nu kăn ƀô̆ dăr lăng păng vă jê̆ 500 ‘nu kăn ƀô̆ pơ vih pơ văn, đei hloi khul linh Công an, khul jang pơ gang, khul vei lăng sơ đơ̆ng.

Ƀok Nguyễn Văn Long, Phŏ Kơ dră Anih vei lăng pơ tho pơ hrăm dêh char Gia Lai ăn tơ băt, Anih vei lăng pơ tho pơ hrăm Gia Lai hlôi chih tơ lĕch trong pơ gơ̆r thi tốt nghiệp THPT hăm 4 tăl vă tơ jră hăm tơ drong jĭ covid 19. Đơ̆ng dang ei truh năr thi, dôm khul pơ gơ̆r thi THPT tơ̆ dêh char Gia Lai hơ met trong tơ jră hăm dôm tơ drong krê kơ đei ưh kơ ê vă ‘măng thi gơ̆h pơ gơ̆r sơ đơ̆ng, tơ păt ‘lơ̆ng, iŏk đei jơ nei hơ iă hlŏh.

“Anih vei lăng pơ tho pơ hrăm dêh char pơ tho ăn rim anih, khul grŭp, hnam trưng tơ lĕch dôm tơ drong jang ăn ‘măng thi trŏ tơ drong hơ găt, lăp ‘lơ̆ng, vă pơm ‘lơ̆ng ăn tơ drong tang găn jĭ covid -19 oei tơ pŏh tôch hơ mơt hrei ‘nâu. Lơ̆m nŏh đei 4 trong pơ gơ̆r thi mă lăp hăm 4 tăl jĭ thoi yơ, bơ̆ jang ‘lơ̆ng kiơ̆ trong tang găn jĭ 5K adrol, lơ̆m păng đơ̆ng rŏng kơ thi. Anih vei lăng đei hla ar athei hŏk tro, thây kô vang thi, kăn ƀô̆ lăng thi athei chih tơ roi găh jơ hngâm jăn adrol 7 năr vă mât lơ̆m năr thi păng gơih pơ đĭ rim tơ drong tơ roi găh anih chih măt thi, dôm anih pơ gơ̆r thi vă tơ blang, hơ met pơ ‘lơ̆ng”.

            Hoàng Qui: Chih

Dơ̆ng: Tơ blơ̆