VOV4.Bahnar - ‘Năr brei (22/7), Anih pơ gơ̆r jang tang găn jĭ Covid-19 dêh char Gia Lai pơ gơ̆r hop akŏm hăt hot vă tơ lĕch jang rim trong jang kăl tang găn jĭ đơ̆ng rŏng kơ tơ ring hơ nơ̆ng đei dôm bơ ngai jĭ SARS-CoV-2. Tơ roi tơ băt tơ̆ ‘măng hop akŏm, jô̆ đơ̆ng ‘năr 26/4 truh ‘năr 22/7, Gia Lai đei 21 ‘nu jĭ SARS-CoV-2, lơ̆m noh đei 5 ‘nu đĭ klăih kơ jĭ brŏk đơ̆ng hnam pơ gang bơ̆ih.

Tơ̆ hơ năp đei ƀôh  krê hơ mơt, Anih pơ gơ̆r jang tang găh jĭ Covid-19 dêh char Gia Lai athei rim anih jang kơ pal kăl mă tơ tĕnh pơ gơ̆r tơ chă, hơ len lăng, tơ mơ̆t dơ̆ng rim hơ nih ƀơm truh păng tơ chă mă tĕnh, pơ gơ̆r hơ len lăng ăn dôm bơ ngai huơ̆r gre păng hơ nih akŏm lơ kon pơ lei oei tơ̆ pơ lei tơm Pleiku. Pơ gơ̆r gơ var ‘mơ̆i tơ ring thị trấn Kbang, plei Tà Kơ, (xăh Sơ Pai, apŭng Kbang) păng dôm hơ nih ƀơm truh dôm bơ ngai jĭ; iŏk pham hơ len lăng tơ tom ăn dôm bơ ngai F1, F2, kŭm nhen prŭih pơ gang rim hơ nih pơ rang jĭ ƀơm truh dôm bơ ngai jĭ.

Thuem: Tơ blơ̆