VOV4.Bahnar -  Kơsơ̆ năr 19/7, Dơnŏ anĭh chĕp pơgơ̆r tang găn jĭ Covid-19 dêh char Gia Lai drơ̆ng mĭnh nơ̆r trong vă jang sơng iŏk 1.000 ‘nu kon pơlei đơ̆ng pơlei tơm Hồ Chí Minh păng dêh char Bình Dương (dôm tơring tŏk bŏk đei jĭ hơbŭh Covid-19 kơtang) brŏk vĭh tơ̆ tơring. Mă hơdăh, dêh char Gia Lai gô pơgơ̆r sơng iŏk 1.000 ‘nu kon pơlei ‘nŏh đei bơngai ‘lŏ kră, đe hơ iŏh, bơngai jĭ jăn, bơngai mơmat tat găh jên hu, bơngai jang hiong tơdrong jang, bơngai kon kông, bơngai drŏ kăn hơnăp. Găh gre chơ dôm bơngai au ‘nŏh hăm gre păr păng gre trong tĕh. Dôm kon pơlei au ŭnh hnam tơ̆ tơring ayơ ‘nŏh gô đei chơ ba tơ̆ nŏh păng ăn oei hơdrô̆ kiơ̆ tơdrong tơchơ̆t. Tơ̆ hơnăp jĭ hơbŭh Covid-19 pơrăm kơtang tơ̆ rim dêh char tơ jê̆, Gia Lai hlôi pơjing 21 hơnĭh ăn oei hơdrô̆ akŏm lơ̆m dêh char, hăm akŏp măt bơngai gơ̆h oei trŭh vă jê̆ 3000 ‘nu bơngai.

Tơblơ̆ nơ̆r: Amazưt