VOV4.Bahnar - Đơ̆ng năr 27/5 trŭh dang ei, tơ̆ dêh char Gia Lai hlôi đei 4 hơnĭh đei tơdrong jĭ pơngĕh akar tơ̆ kơpô, rơmo hăm vă jê̆ 70 tŏ rơmo lơ̆m 3 apŭng Mang Yang, Chư Se, Đak Đoa jĭ păng tŏk bŏk đei ƀô̆h tơpŏh kơtang. Hrei au, akŏp kon tơrong kơ dêh char Gia lai đei hlŏh 435.000 tŏ, jing dêh char đei kon tơrong lơ hlŏh dơ̆ng mă 2 lơ̆m tĕh đak bơ̆n; găh lơ chă rong lơ̆m ŭnh hnam kơ dĭh, tơring kon kông.

Tơdrong tang găn jĭ, vei lăng năng tông kon tơrong ‘nŏh trong jang kăl hlŏh lơ̆m atŏk tơ iung mŭk drăm kơ kon pơlei. Kơ yuơ lơ lŏh, Dơnŏ anĭh vei lăng kon pơlei dêh char Gia Lai hlôi chĭh pơtrŭh hla bơar gĭt kăl găh tơdrong tơlĕch jang rim trong jang tang găn jĭ pơ ‘ngĕh akar tơ̆ kơpô rơmo lơ̆m dêh char. Kiơ̆ kơ ‘nŏh, Dơnŏ anih vei lăng kon pơlei dêh char Gia Lai athei rim tơring păng păng hơnĭh jang vei lăng chŏh jang sa jang kiơ̆ kơ jăp rim trong jang tang găn tơpŏh, răt vaccine ƀet ăn kon tơrong, iung jang tơgŭm djru păng pơlôch hŭt dôm kon tơrong lôch, dăr lăng kơ jăp găh tơdrong jĭ jăn tơ̆ kon tơrong vă hơmet ăn rim trong bơ̆ jang hơmet ăn.

Tơblơ̆ nơ̆r: Amazưt