VOV4.Bahnar - Pơ gê 2/4, Dơ nŏ anih vei lăng kon pơ lei dêh char Gia Lai pơ gơ̆r hop akŏm trư̆k tuyê̆n pơ tôch tơ drong jang atŏk tơ iung mŭk drăm tơ pôl, vei sơ đơ̆ng tĕh đak lơ̆m jăl khei mă I, tơ lĕch tơ drong jang lơ̆m jăl khei mă II sơ năm 2021. Jăl khei mă I sơ năm 2021, mă đơ̆ng athei tơ jră hăm lơ tơ drong mơ mat tat yoa đơ̆ng jĭ Covid-19 tơ pŏh tơ̆ 1,2 tơ ring lơ̆m dêh char, mă lei dêh char Gia Lai hlôi tang găn ‘lơ̆ng tơ drong jĭ.

 Lơ̆m jăl khei mă I sơ năm 2021, bơ̆ jang hrơ̆ch 2 tơ drong jang, tang găn jĭ Covid-19 hai, akŏm jơ hngâm jang atŏk tơ iung mŭk drăm tơ pôl hai, pơ tôch pơ yang Phang 2020-2021, lơ̆m dêh char rei pơ tăm đei hlŏh 77.000 ha ‘long pơ tăm lơ kơ loăi. Kơ jă tơ mam đơ̆ng jang kơ măy kơ mŏk 3 khei blŭng sơ năm 2021 đei hlŏh 5.525 ti hlak jên. Akŏm đĭ đăng jên tơ mât jang lơ̆m tơ pôl tơ̆ dêh char 3 khei blŭng sơ năm đei 13.996 ti, iŏk đei 20% nơ̆r hơ găt. Lơ̆m jăl khei mă I mơ̆n, dêh char kĭ tơ mât jên ăn 7 tơ drong jang, hăm kơ sô̆ jên truh 1.988 ti păng đei 220 anĭh tĕch mơ dro, 48 anih jang ‘nao pơ jing plơ̆ng.

Dơ̆ng: Tơ blơ̆