VOV4.Bahnar – Apŭng Đăk Đoa, dêh char Gia Lai xă hloh 990 km2, hăm  111 thôn, pơlei, akŏm lơ̆m 17 xăh, thĭ xăh. Hơgăt teh xă, kon pơlei ưh đei lơ, mă lei gơnơm jang tơnăp dôm mạng tơpôl nhen zalo, facebook tơdrong jang tơroi tơbăt tơ̆ tơring gơh hiôk hian păng đei jơnei kơjăp hloh.

Chĕp lơ̆m ti điê̆n thoăi thŏng minh, Phạm Công Tùng, oei tơ̆ thôn Tân Lập, xăh Trang, apŭng Đăk Đoa, Gia Lai pơjing grŭp Zalo kơ thôn vă chă akŏm pơtơ̆ng găh pơrang jĭ COVID-19. Tùng ăn tơbăt, rim năr, jơnŭm pơgơ̆r jang tang găn păng tơjră pơrang jĭ kơ xăh pơtruh 2 tơdrong pơtơ̆ng noh chih akŏm tơdrong đei ƀôh găh pơrang jĭ tơ̆ dêh char Gia Lai păng dôm dêh char, plei tơm đei pơrang. Lơ kơtơ̆ng ang đei tơbang hăm um bieh, noh rim bơngai ƀônh băt đei kon hơ ioh po năm hŏk, năm jang chôt vih đơ̆ng yơ noh athei pơm kiơ̆ pơkăp oei tơklăh minh ƀôt, dăh mă kăl tơroi tơbăt y tê̆ đĕch păng kơdih hơlen jơhngơ̆m jăn tơ̆ hnam. Duh kiơ̆ đơ̆ng grŭp Zalo âu, kon pơlei lơ̆m thôn duh tơgŭm jơnŭm pơgơ̆r jang hơlen kơjăp kon pơlei hăm đei pơm kiơ̆ tơnăp dôm tơchơ̆t găh tang găn păng tơjră pơrang jĭ dăh mă ưh: “Tơdrong hơlen kon pơlei đơ̆ng tơring hơbuh pơrang jĭ chôt vih dăh mă kon pơlei đĭ khei năr pơkăp oei tơklăh minh ƀôt chôt vih pơkăp oei tơklăh tơ̆ hnam, kon hơ ioh năm hŏk, năm jang chôt vih noh nhôn adoi hơlen kơjăp. Kon hơ ioh năm hŏk chôt vih noh đe hlôi tơroi kơtă lơ̆m tin nhăn, tơbang pơtơ̆ng atŭm, tơroi hăm anih jang y tê̆, Anih vei lăng kon pơlei xăh vă pơkăl đe xư tơroi y tê̆ vă kon pơlei ưh đei pơngơ̆t kơ đon”

Ƀok En – Kơdră Anih vei lăng kon pơlei, Kơdră Jơnŭm pơgơ̆r jang tang găn păng tơjră pơrang jĭ COVID-19 xăh Trang, apŭng Đăk Đoa ăn tơbăt, dang ei, 5 thôn lơ̆m xăh adoi đei grŭp Zalo. Rim grŭp đei đơ̆ng 120 truh 150 ‘nu jing dôm bơngai tang măt ăn dôm unh hnam kon pơlei. Jơnŭm pơgơ̆r tang găn păng tơjră pơrang jĭ kơ xăh axong bơngai jang chih măt lơ̆m grŭp vă ƀônh ăn tơdrong tơl nơ̆r kơtă hăm dôm tơdrong mă kon pơlei kăl băt. Phơ phŏ, noh jing dôm tơdrong apinh găh hla bar tơroi tơbăt y tê̆, phŏ noh dôm tơdrong kăl pơm kiơ̆ ƀơ̆t pơkăp oei tơklăh tơ̆ hnam, phŏ noh apinh găh dôm tơdrong mă kon pơlei chôt vih đơ̆ng dôm dêh char, plei tơm nai vih truh tơring tơroi y tê̆ bơih dăh mă tam:  “Gơnơm đei grŭp zalo âu noh lơ̆m khei năr âu ki, lơ̆m xăh hlôi băt đei 143 ‘nu bơngai chôt vih đơ̆ng tơring nai. Lơ̆m noh, minh ƀar bơngai athei pơm kiơ̆ pơkăp oei tơklăh minh ƀôt, minh ƀar ‘nu noh pơkăp oei tơklăh tơ̆ hnam. Kon pơlei băt noh hlôi tơroi lơ̆m zalo noh lăng hơnăn dôm tơring hơbuh pơrang jĭ, đe băt hloi, đe kơdih kơchăng. Ƀơ̆t mă plei tơm Hồ Chí Minh athei pơm kiơ̆ Tơchơ̆t 16 noh đe kơdih năm truh anih jang y tê̆.”

Thiếu tá Khuất Đức Hiệu – Kơdră Kŏng ang xăh Trang ăn tơbăt, duh gơnơm pơyua lơ̆m tơroh dih băl đơ̆ng grŭp Zalo, đơ̆ng khei 3 truh khei 6/2021, anih jang hlôi keh đang tơchơ̆t axong hloh 3.600 theh kăng kươk kon pơlei mă duh oei vei xơđơ̆ng pơkăp tang găn păng tơjră pơrang jĭ. Kŏng ang xăh Trang pơtơ̆ng găh khei năr, anih bơ̆ hla bar vă axong theh kăng kươk kon pơlei. Kon pơlei adrô̆ truh anih pơkăp axong theh 2 ‘măng noh ăh iŏk kơsô̆ pơkăp păng bơ̆ hla bar kăl. Kơyuơ noh, kon pơlei ưh đei gô đunh, hla bar bơ̆ adoi hiôk păng vei xơđơ̆ng oei ataih băl, ưh đei akŏm hloh 20 ‘nu tơ̆ anih ‘măn bơ̆ theh kăng kươk kon pơlei: “Iŏk kơsô̆ đang, ba hơvơn đe chih măt lơ̆m zalo kơ po hloi, hơvơn kon pơlei vih tơ̆ hnam, vih truh tơ̆ hnam đe chă hơvơn băl, kơdih chă tơroi dih băl. Pơhlom 30 pơnĭt noh ba chih minh ‘măng noh ơ mih ma duch nă, dang ei truh kơsô̆ 59 noh dôm bơngai đei kơsô̆ 69 noh đe hơmet, đe năm truh. Pơma pơtơ̆ng lơ̆m trang zalo âu, pơjing tơdrong hiôk ăn kon pơlei păng ưh đei akŏm lơ bơngai.”

Kiơ̆ tơdrong hơlen đơ̆ng apŭng Đăk Đoa, dang ei tơring đei hloh 40 rơbâu kơsô̆ điê̆n thoăi yi đŏng đei yua 3G, 4G. Xơkơ̆t âu jing minh kênh tơroi tơbăt pơyua, tenh păng jên huach tŏ xĕt, đơ̆ng khei 3/2020, Anih vei lăng kon pơlei apŭng Đăk Đoa hlôi pơjao Kŏng ang apŭng pơjing atŭm hăm dôm fanpage lơ̆m  facebook păng kênh tơroi tơbăt Zalo official Account ăn Anih vei lăng kon pơlei păng kŏng ang 17 xăh, thĭ trâ̆n lơ̆m jâ̆p apŭng. Tơ̆ âu, kon pơlei gơh hơlen băt kơtơ̆ng găh mŭk drăm – tơpôl tơ̆ tơring, hơlen băt tơdrong bơ̆ hla bar hanh chĭnh păng pơtơ̆ng găh pơrang jĭ. Tơ̆ xăh, anih jang duh tơgŭm ăn dôm thôn pơjing grŭp zalo vă tơroh dih băl hăm kon pơlei găh tơdrong jang tang găn păng tơjră pơrang jĭ COVID-19.

Tơdrong kăp gĭt noh dôm kênh kơtơ̆ng ang đơ̆ng apŭng, truh xăh, jur tơ̆ thôn, pơlei adoi đei tơroh dih băl. Kơyuơ noh, kăl mơ̆t lơ̆m khul âu, kon pơlei gơh chă pơma điê̆n thoăi hăm kơdră jơnŭm jang tang găn păng tơjră pơrang jĭ dăh mă kơdră kŏng ang xăh, apŭng mưh đei tơdrong kăl. Đại uý Đàm Mai Minh Tuấn, Phŏ kơdră Khul pơjing tơdrong jang Vei xơđơ̆ng tơpôl teh đak, Kŏng ang apŭng Đăk Đoa ăn tơbăt, tơdrong jang kơ khul lơ̆m grŭp online hlôi tơgŭm tơjur ƀiơ̆ jên huach, atŭm hăm noh tơdrong tơroi tơbăt duh đei hơtŏk ƀôh hơdăh: “Đơ̆ng rŏng kơ pơjing grŭp zalo păng fanpage, tơdrong hơmet dôm hô sơ tenh kuăng hloh. Kơsô̆ hơdruh tơdăm yua mạng tơpôl lơ hloh bơngai ‘lŏ xơnăm, noh kơsô̆ bơngai mă kơdih tơrĕk adoi tơnăp hloh adrol ki. Ăh kang ƀô̆ năm truh thôn pơlei, chă chŭp um, akŏm ƀai chih, video, kơmăi kơmŏk chĕp ba hrat hloh. Mă lei hăm mạng tơpôl, noh bot tenh, kăl pơtruh nơ̆r tơroi lơ̆m 3 – 4 yây đĕch noh rim bơngai băt bơih.”

Tơdrong yua kơmăi tĭnh, điê̆n thoăi thŏng minh dang ei đei ƀôh lơ tơ̆ dêh char Gia Lai, jô̆ hloi hăm tơring ataih yaih; tơdrong mă kon pơlei yua dôm mạng tơpôl lơ̆m chă pơma dơnuh pơtruh nơ̆r dih băl duh đei ƀôh lơ. Iŏk yua mạng tơpôl lơ̆m vei lăng, pơgơ̆r jang kơ dôm anih jang, thôn xăh tơ̆ Đăk Đoa pơma adrô̆, Gia Lai pơma atŭm hlôi hơmet đei tơdrong tơnap tap kơyuơ trong ataih dih băl, tơgŭm ăn kon pơlei tơjê̆ hăm jơnŭm pơgơ̆r tơring hloh. Lơ̆m tơdrong pơm kiơ̆ pơkăp oei ataih băl lơ̆m tơpôl vă tang găn păng tơjră pơrang jĭ COVID-19, dôm tơdrong iŏk yua noh roi ƀôh pơyua hloh, tơgop tang găn pơrang jĭ, vei xơđơ̆ng ăn tơdrong jang tĕch pơdro.

Lan chih păng pơre nơ̆r