VOV4.Bahnar - Anih pơ gơ̆r jang tang găn jĭ dêh char Gia Lai tơ lĕch trong jang pơ long năng, vei lăng bơ ngai jĭ COVID-19 ưh đei yuh, hiĕn, bơ ngai tơ pŏh hơ lơ̆k dơ̆ng pơ rang jĭ Sars-Cov-2 păng bơ ngai tơ ƀâp, ngôi hơ dai (F1) tơ̆ hnam. Mă hơ dăh, tơ̆ tơ drong Tơ chơ̆t Anih pơ gơ̆r tang găn jĭ COVID-19 Gia Lai chih: đơ̆ng khei 10/2021 truh dang ei, bơ ngai vih kơ dih tơ̆ dêh char tŏk tôch lơ, pơm ăn dôm anih oei hơ drô̆ hrăt bơ ngai, kơ sô̆ bơ ngai F0 tŏk lơ. Gia Lai hlôi pơ jing 2 tŏ hnam pơ gang hơ met ăn bơ ngai jĭ F0, mă lei hrăt hrot bơ ngai ‘năi. 

Gia Lai tơ lĕch trong jang pơ long năng tơ drong vei lăng F0, F1 tơ̆ hnam

Kiơ̆ trong jang ‘nao tơ lĕch, Gia Lai vă jang pơ long năng, hơ met ăn F0 ‘nao đei jĭ hơ lơ̆k dơ̆ng tơ̆ hnam, tơ dăh hơ kâu ưh đei hiĕn yuh; bơ ngai hlôi ƀet tôm 2 jrŭm vaccine tang găn jĭ COVID-19; bơ ngai đơ̆ng 1 sơ năm truh hơ la kơ 50 sơ năm, ưh đei tơ drong jĭ nai, ưh đei hơ năp kiơ. Tơ drong vei lăng tơ̆ hnam kơ dih tơ̆ Gia Lai hăm bơ ngai jĭ F0 đei jĭ hơ lơ̆k dơ̆ng, đei tơ mât yoa đơ̆ng ‘năr 1/12/2021, hăm F0 ưh đei hiĕn, yuh đei jang kiơ̆ mưh dêh char đei đơ̆ng 5000 ‘nu bơ ngai jĭ tŏk tơ̆ kơ pal.

Dơ̆ng: Tơ blơ̆