VOV4.Bahnar - Hăm đon pơ hnŏng “tang găn jĭ nhen thoi tang găn hơ yăt”, kon pơ lei dôm hơ drĕch hơ drung tơ̆ tơ ring sơ lam lơ̆m dêh char Gia Lai vang kĭ pơ kăp hăm anih jang đảng, khul kơ dră tơ ring păng dôm khul jang kơ pal găn ưh ăn bơ ngai mât lĕch lơ̆m tĕh đak glăi luơ̆t vă tang găn jĭ Covid-19 tơ pŏh.

 Jĭ Covid-19 tơ̆ tĕh đak bơ̆n roi hơ mơt, tôch krê hăm kơ sô̆ bơ ngai ‘nao jĭ đei hơ nơ̆ng lơ̆m dôm năr âu ki. Tơ̆ tĕh đak Campuchia tơ til bơ̆n, jĭ kŭm tơ pŏh tôch dêh tơ̆ lơ dêh char, pơ lei tơm (plt). Yoa thoi nŏh lơ khei âu ki, khul linh ƀô đô̆i vei lăng tơ ring sơ lam dêh char Gia Lai vei kơ jăp anih gak, vei lăng ‘lơ̆ng tơ ring sơ lam vă bơ̆ jang đei yoa 2 tơ drong jang tơm. ‘Nao âu, Anih chĕp kơ̆l pơ gơ̆r khul linh ƀô đô̆i vei lăng tơ ring sơ lam Gia Lai ăn 48 ‘nu kăn ƀô̆, linh năm tơ̆ tơ ring sơ lam vang jang lơ̆m khul linh ƀô đô̆i vei lăng tơ ring sơ lam bơ̆ jang dăr joang, vei lăng, tang găn bơ ngai mât lĕch glăi luơ̆t, găn ưh ăn tơ drong jĭ tơ pŏh mât lơ̆m tĕh đak.

 Vă akŏm jơ hngâm pran đơ̆ng kon pơ lei lơ̆m tơ drong tang găn jĭ Covid-19 păng găn bơ ngai mât lĕch glăi luơ̆t, đơ̆ng blŭng khei 5 âu ki, Khul kơ dră chĕp kơ̆l Đảng dêh char Gia Lai đei hla ar chih athei rim anih jang đảng, khul kơ dră pơ gơ̆r, anih jang kơ pal, mă loi tơ̆ dôm tơ ring sơ lam lăng kiơ̆ tơ drong jang đơ̆ng kơ dih vang jang hơ doi hăm ƀô đô̆i vei lăng tơ ring sơ lam tơ lĕch, pơ gơ̆r tơ drong jang “Đĭ đăng kon pơ lei vang tang găn jĭ Covid-19 păng bơ ngai mât lĕch lơ̆m tĕh đak glăi luơ̆t” vă găn bơ ngai đơ̆ng nai mât tơ̆ tơ ring sơ lam glăi luơ̆t. Pơ ma găh tơ drong ‘nâu, ƀok Nguyễn Trọng Phú-Kơ dră vei lăng kon pơ lei xăh Ia Pnôn (apŭng Đức Cơ) ăn tơ băt tơ drong tơ roi tơ băt tŏk bŏk đei xăh bơ̆ jang kiơ̆ lơ tơ drong. Xăh ăn khul linh dân quân gak hơ nơ̆ng tơ̆ dôm anih tang găn jĭ vă bơ̆ jang hăm ƀô đô̆i vei lăng tơ ring sơ lam vang dăr joang, hơ len năng tơ̆ tơ ring sơ lam. Atŭm hăm ‘nŏh, xăh jang hơ doi hăm Khul jang tơ̆ tơ ring đơ̆ng Kơ đông linh Ia Pnôn krao hơ vơn kon pơ lei tơ̆ tơ ring kĭ pơ kăp pơm kiơ̆ ‘lơ̆ng dôm trong jang tang găn jĭ, ưh đei mât lĕch tơ̆ tơ ring sơ lam glăi luơ̆t, ưh đei tơ gŭm, vei ôn, chông trong ăn bơp ngai nai mât lĕch glăi luơ̆t, tơ tom roi tơ băt, vang tơ kêng tơ drong yoch…

Ƀok Nguyễn Trọng Phú-Kơ dră vei lăng kon pơ lei xăh Ia Pnôn (apŭng Đức Cơ) pơ ma hơ dăh đon jang kiơ̆ ‘lơ̆ng đơ̆ng kon pơ lei: “Kon pơ lei lơ̆m xăh pơm kiơ̆ tôch ‘lơ̆ng dôm tơ drong hơ găt tang găn jĭ. 1,2 ‘nu bơ ngai iŏk unh om păih Campuchia mă lei đơ̆ng năr đei jĭ ưh pă đei năm ngôi tơ̆ ‘nhŏng ŏh bơih. Kơ tă lơ̆m pơ lei, lơ̆m unh hnam đei bơ ngai lôch, mih ma duch nă lăp krao điên thoăi pơ ma nuh hăm băl đĕch, ưh pă đei năm hơ pong bơih”.

 Kiơ̆ kơ sô̆ chih jô̆ đơ̆ng Anih chĕp kơ̆l Ƀô đô̆i vei lăng tơ ring sơ lam dêh char Gia Lai, truh dang ei, tơ̆ 7 xăh sơ lam kơ dêh char đei 7.763 lơ̆m kơ sô̆ 12.024 unh hnam kĭ pơ kăp pơm kiơ̆ ‘lơ̆ng dôm trong jang tang găh jĭ Covid-19 păng găn bơ ngai mât lĕch glăi luơ̆t. Đại úy Nguyễn Viết Hoàn-Phŏ Kơ dră jang Chinh trĭ Kơ đông linh Ia O (apŭng Ia Grai) ăn tơ băt: kơ đông jang hơ doi hăm tơ ring krao hơ vơn vă jê̆ 50% kơ sô̆ unh hnam kon pơ lei lơ̆m xăh kĭ hla ar pơ kăp. Lơ̆m nŏh, 78 unh hnam đei mir roh jê̆ trong sơ lam, jrăng sơ lam; 265 unh hnam đei ‘nhŏng ŏh păih Campuchia vang kĭ pơ kăp ‘năi. ‘Ngoăih kơ ‘nŏh, kơ đông oei ăn khul linh năm tơ roi tơ băt, krao hơ vơn tơ ‘ngla gre chơ tơ moi, thŏng nan kĭ pơ kăp jang kiơ̆ ‘lơ̆ng dôm trong tang găn jĭ, ưh đei tơ gŭm, chơ ôn bơ ngai mât lĕch lơ̆m tĕh đak glăi luơ̆t…

Đơ̆ng rŏng kơ đŏk hơ len tôm tơ drong panwg kĭ pơ kăp, yă Rơ Mah Hlên (tơ̆ plei Bi, xăh Ia O, apŭng Ia Grai) tơ roi: “Tơ drong jĭ tôch hơ mơt. Yoa thoi nŏh, kon pơ lei jang kiơ̆ ‘lơ̆ng dôm trong tang găn jĭ vă vei lăng jơ hngâm pran kơ dih kâu păng dôm bơ ngai jŭm dăr”.

 Tơ̆ xăh sơ lam Ia Mơr (apŭng Chư Prông), tơ drong roi tơ băt hơ nơ̆ng đei tư̆k pran kiơ̆ đơ̆ng a loa ra por tơ̆ pơ lei pơ la, pơih hơ nơ̆ng rim pơ gê păng rim kơ sơ̆, 1 ‘măng pơih đunh 30 pơ nĭt. Khul jang tơ̆ tơ ring đơ̆ng Kơ đông linh Ia Mơr vang jang hăm dôm anih jang kơ pal, khul tơ pôl pơ gơ̆r năm roi tơ băt hăm 2 nơ̆r jrai păng yoăn truh tơ̆ rim pơ lei pơ lei, mir rŏh, anih đe oei choh jang. Tơ̆ dôm anih gak tang găn jĭ, khul jang kơ pal hơ nơ̆ng roi tơ băt, pơ tho tơ ƀôh ăn kon pơ lei dôm trong tang găn jĭ.

Kră pơ lei Ksor H’Blâm (tơ̆ plei Krông, xăh Ia Mơr) ăn tơ băt: “Nơ̆r pơ re đơ̆ng a loa năr yơ kŭm pơih; kăn ƀô̆ tơ ƀâp bu kŭm pơ ma. Đunh hơ nơ̆ng hơ nong kơ na rim tơ drong sư mât lơ̆m đon tơ chĕng, pơm tơ plih đon hlôh vao ăn kon pơ lei. Đĭ đăng unh hnam lơ̆m pơ lei, lơ̆m xăh vang kĭ pơ kăp pơm kiơ̆ ‘lơ̆ng dôm trong jang tang găn jĭ, ưh đei pơm glăi, vei lăng ôn, tơ gŭm ăn dôm bơ ngai kơ dâu tơ̆ tĕh đak đe. Rim bơ ngai đei đon kơ chăng, ƀôh bơ ngai đơ̆ng nai mât tơ̆ tơ ring, mă mât yoa tơ drong kiơ kŭm năm tơ roi hloi ăn khul jang kơ pal”.

Dơ̆ng: Tơ blơ̆