VOV4.Bahnar - Kơ hrĕng kang ƀô̆ jang pơ gang, kŏng an păng khŭl linh găh Anih pơ gơ̆r tang găn jĭ COVID-19 Gia Lai hlôi hăt hot bơ̆ jang kiơ̆ klăih xong hơ nih, ăn oei hơ drô̆ rơ bâu ‘nu kon pơ lei brŏk đơ̆ng tơ ring đei jĭ pơ lei tơm Hồ Chí Minh, đơ̆ng rŏng kơ pơ lei tơm âu pơm kiơ̆ ư̆h kơ ăn yak vih vơ̆t lơ̆m tơ pôl. Tơ drong klăih song hơ nih pơ gơ̆r đơ̆ng 2 jơ pơ gê ‘năr 31/5. Kiơ̆ kơ ‘noh, khŭl jang kơ Anih pơ gơ̆r tang găn jĭ COVID-19 Gia Lai hlôi athei hloh 1500 ‘nu lơ̆m hloh 53 tong gre păng 116 ‘nu hao lơ̆m 1 tong gre păr đơ̆ng pơ lei tơm Hồ Chí Minh brŏk tơ̆ pơ lei tơm Pleiku pơm kiơ̆ tơ roi tơ băt y tế. Đơ̆ng rŏng kơ hơ len lăng, 667 ‘nu đei iŏk pham, đak muh hơ len lăng Covid-19, 133 ‘nu đei ăn năm oei hơ drô̆ akŏm tơ̆ apŭng Đức Cơ. Dôm tơ moi uơ oei dơ̆ng pơm kiơ̆ ăn oei hơ drô̆ tơ̆ hnam, đei tơ drong dăr lăng đơ̆ng khŭl kơ dră tơ ring. ‘Ngoăih kơ tơ drong vei lăng tơ moi tơ̆ cham gre păr, đĭ đăng rim hơ nih gre dơ̆ng lơ̆m dêh char Gia Lai athei rim gre tơ roi tơ băt, vei lăng hăm camera dăr lăng tơ drong rim gre brŏk đơ̆ng pơ lei tơm Hồ Chí Minh vă tang găn jĭ. Dêh char hlôi pơm 4 hơ nih găn vei lăng jĭ lơ̆m dôm trong gre 14, 19 păng 25 năm mơ̆t lơ̆m tơ ring đơ̆ng tŏk bŏk măng ‘năr 31/5, vei lăng păng hơ nơ̆ng klăih song hơ nih hăm dôm gre brŏk đơ̆ng pơ lei tơm Hồ Chí Minh.

Thuem: Tơ blơ̆