VOV4.Bahnar  – Vă hơmet ăn 'măng pơlong tôt ngĭp trung hŏk phôh thŏng Kuôk ya, Anih Pơtho Pơhrăm dêh char Gia Lai hlôi tơlĕch pơm jang 4 jăl vă tơjră hăm pơrang jĭ Covid – 19. Kiơ̆ Anih Pơtho Pơhrăm dêh char Gia Lai, 'măng pơlong tôt ngĭp trung hŏk phôh thŏng Kuôk ya xơnăm âu, dêh char đei hloh 14 rơbâu 'nu bơngai chih măt pơlong, đei pơgơ̆r tơ̆ 39 anih pơlong. Dang ei atŭm hăm pơgơ̆r hŏk ôn tâ̆p ăn hŏk tro, Gia Lai hơtŏk tơroi tơbăt, tơtom pơtruh hăm kang ƀô̆, bơngai pơtho, bơngai jang păng bơngai pơlong, mĕ ƀă hŏk tro găh tơdrong hơbuh pơrang jĭ atŭm hăm dôm tơdrong tơbang đơ̆ng anih jang kơpal găh tang găn păng tơjră pơrang jĭ. Pơgơ̆r pơm kiơ̆ tơnăp tơchơ̆t 5K adrol, lơ̆m păng đơ̆ng rŏng kơ pơlong... vă 'măng pơlong đei pơgơ̆r keh kong xơđơ̆ng, truh pơkăp ăh blŭng khei 7 âu kơnh. Anih Pơtho Pơhrăm dêh char Gia Lai pơkăl đe hŏk tro pơlong, kang ƀô̆ lăng thi păng dôm bơngai jang lơ̆m 'măng pơlong athei pơm kiơ̆ pơkăp tơroi tơbăt y tê̆ adrol 7 năr truh 'năr pơlong.

Lan chih păng pơre nơ̆r