VOV4.Bahnar – Vă kơhret kơjăp tơdrong pơm kiơ̆ Tơchơ̆t 16/CT-TTg kiơ̆ Jơnŭm pơgơ̆r jang tang găn păng tơjră pơrang jĭ COVID-19 Gia Lai, Anih vei lăng kon pơlei plei tơm Pleiku (dêh char Gia Lai) đei hla bar pơtho găh tơdrong vih vơ̆t, vă tang găn ƀiơ̆ bơngai lĕch tơ̆ trong. Anih vei lăng kon pơlei plei tơm Pleiku pơkăl dôm bơngai lĕch tơ̆ trong kơyuơ kơ năm jang noh athei 'nhăk hla bar pơkăl noh theh kŏng chư̆k, theh pơkăp tơdrong jang (dăh mă hla bar vih vơ̆t yuơ anih jang axong ăn) vă vei xơđơ̆ng ăn tơdrong vih vơ̆t hăm dôm anih pơkăp hơlen kơ xăh, phương dăh mă dôm anih pơkăp hơlen kơ khul Kŏng ang plei tơm. Plei tơm Pleiku pơm kiơ̆ Tơchơ̆t 16/CT-TTg đơ̆ng năr 28/8 truh dang ei, mă kăl kon pơlei pơm kiơ̆ tơnăp tơchơ̆t. Mă lei, duh oei minh ƀar anih oei akŏm lơ bơngai, tơdrong chô̆ che gom ƀŏ ưh kơ trŏ pơkăp duh oei ƀôh lơ, lơ bơngai lĕch tơ̆ trong ưh đei tơdrong kăl. Đơ̆ng năr 28/8 truh năr 5/9, plei tơm Pleiku hlôi pơkăp phak 93 'nu pơm glăi pơkăp tang găn păng tơjră pơrang jĭ hăm kơsô̆ jên phak hloh 303 trĭu hlj.  

Lan chih păng pơre nơ̆r