Bahnar - Pơ gê 4/1, dêh char Gia Lai pơ gơ̆r pơm lêh năm bơ̆ jang, sir chă, chơ tơ vih kơ ting linh păng bơ ngai juăt jang kơ Việt Nam lôch tang tĕh đak lơ̆m tơ drong tơ blăh tơ̆ Campuchia chơ vih dơ̆ng tơ̆ tĕh đak bơ̆n, lơ̆m pơ yan phang 2021-2022.

Vang năm chă, sir akŏm, chơ brŏk kơ ting linh lôch tang tĕh đak ‘măng mă âu đei 62 ‘nu kăn ƀô̆, linh găh Khul K52, Anih chĕp kơ̆l pơ gơ̆r khul linh dêh char Gia Lai, đei klăih song pơm 3 khul, năm chă tơ̆ 3 dêh char Preah Vihear, Stung Treng păng Ratanakiri, tĕh đak Campuchia.

Đei băt đơ̆ng sơ năm 2001, truh dang ei, Khul K52 dêh char Gia Lai năm chă, sir akŏm păng chơ tơ vih đei 1.428 kơ̆l linh lôch tang tĕh đak, ƀŭ hơ met tơ̆ Pơ sat linh lôch tang tĕh đak apŭng Đức Cơ, dêh char Gia Lai.

Dơ̆ng: Tơ blơ̆