VOV4.Bahnar - Ƀlep ƀât Têt trung thu 2021, ‘năr 20/9, Khul jang đơ̆ng Dơ nŏ anih vei lăng kon pơ lei dêh char Gia Lai truh hơ pong, asong tơ mam ăn đe hơ iŏh tơ̆ dôm anih oei hơ drô̆ păng hơ iŏh oei hơ met jĭ Covid – 19 tơ̆ dêh char. Dang ei, lơ̆m dêh char Gia Lai đei 92 ‘nu hơ iŏh oei hơ drô̆ păng 23 ‘nu ŏh oei hơ met jĭ Covid – 19.  

Lơ tơ mam đei gơih ăn đe ŏh tơ̆ anih oei hơ drô̆

Yoa ưh gơ̆h pơ jao tơ mam tơ păt ăn đe hơ iŏh, kiơ̆ đơ̆ng đe kăn ƀô̆, linh tơ̆ dôm anih oei hơ drô̆, dôm bơ ngai lơ̆m khul gơih tơ mam ăn đe ŏh păng hmach thơ thou ăn đe ŏh chu phep, pran jăng, jăh lĕch đơ̆ng anih oei hơ drô̆, đei jơ hngâm pran ‘lơ̆ng vă vih hăm unh hnam.

‘Ngoăih kơ tơ mam đơ̆ng Dơ nŏ anih vei lăng kon pơ lei dêh char Gia Lai, truh kơ sơ̆ 20/9, đei vă jê̆ 1000 tơ pu tơ mam đơ̆ng dôm anih jang kơ pal, khul grŭp chă hơ păh ăn đe hơ iŏh tơ̆ anih oei hơ drô̆ păng oei hơ met jĭ Covid – 19. Dôm tơ mam âu đei đe kăn ƀô̆, linh chĕp ba, pơ jao tơ păt ăn đe hơ iŏh bơih.

Dơ̆ng: Tơ blơ̆