VOV4.Bahnar - Dêh char Gia Lai oei adrin hơ met tơ mam, lăm ho\k, bơ ngai jang ăn ‘măng thi Trung học phổ thông te\h đak 2019 vă gơ\h pơ gơ\r sơ đơ\ng ‘lơ\ng, đei yoa. ‘Măng thi Trung học phổ thông te\h đak 2019 tơ\ dêh char Gia Lai pơ gơ\r tơ\ 4 tơ ring, klăih song pơm 36 an^h.

Lơ\m dêh char đei hlo\h 13.200 ‘nu ho\k tro chih măt thi, lơ\m no\h 10,6% j^ ho\k tro bơ ngai kon kông. Truh dang ei, An^h pơ gơ\r thi Trung học phổ thông te\h đak 2019 dêh char Gia Lai hlôi hơ len năng tơ drong hơ met tơ mam, an^h thi tơ\ dôm tơ ring thi.

Dôm hnam trưng THPT oei pơ gơ\r ôn thi ăn ho\k tro đơ\ng dang ei truh ‘năr 20/6; roi tơ băt tơ drong hơ găt thi Trung học phổ thông te\h đak păng set điêm chih tơ băt tốt nghiệp Trung học phổ thông.

{ok Phạm Văn Căn, Chánh văn phòng An^h vei lăng pơ tho pơ hrăm dêh char Gia Lai ăn tơ băt, an^h âu hlôi jang hơ doi hăm An^h jang đoan dêh char Gia Lai, dôm an^h công an, hnam pơ gang, an^h vei lăng trong nơ năm, unh điên tơ le\ch trong tơ gu\m pơ yan thi păng vei lăng ‘lơ\ng dôm tơ drong kăl pơ ‘nho\ ăn ‘măng thi âu.

Dơ\ng: Tơ blơ\