VOV4.Bahnar - Dơnŏ anĭh vei lăng kon pơlei dêh char Gia Lai ‘nao chĭh pơtrŭh hla bơar kăl athei rim tơring lơ̆m dêh char pơdơ̆h hloi tơdrong pơgơ̆r kơdrơ̆m bơngai, tơdrong tĕch mơdro ư̆h kơ kăl vă tang găn jĭ iŏk đơ̆ng tŏk bŏk măng năr 8/5. Kiơ̆ tơdrong tơchơ̆t, Dơnŏ anĭh vei lăng kon pơlei dêh char Gia Lai athei rim tơring lơ̆m dêh char pơdơ̆h hloi pơgơ̆r jŏh ayŏ kơdŏ soang, đă ƀŏng lŏng tơplŏng kơdau, pơm lê̆h, pơgơ̆r et sa kơdrơ̆m bơngai; pơdơ̆h hloi tĕch mơdro ư̆h kơ kăl nhen karaoke, quán bar, hơnĭh jŏh asoang, massage, pơm phim, rim hơnĭh pơchơt điện tử, internet, dơnau glơi…đơ̆ng tŏk bŏk măng năr 8/5. Mĭnh ƀar hơnĭh tĕch đak chehhphe, hơnĭh tĕch sŏng sa pơgê, hơnĭh tĕch mơdro đak nhă, tơplŏng kơdau lơ̆m hnam gơ̆h ăn mơdro mă lei pơm kiơ̆ ƀlep rim tơdrong tơdrong tơchơ̆t tang găn jĭ; kon pơlei năm tơmang hơnih gru gra gĭt kăl dăr sơnăm dăh mă hơnĭh tơmang pơ hiơ̆ kăl gom mŭh măt. Dơnŏ anĭh vei lăng kon pơlei dêh char Gia Lai athei hơnĭh bơ̆ jang pơgang iung jang kơtang vei lăng tang găn jĭ; atŏk kơtang dăr lăng, xek phak dôm bơngai ư̆h kơ gom ƀŏ tơ̆ hơnĭh kơdrơ̆m bơngai. Jô̆ trŭh năr 7/5, Gia Lai hlôi ƀet bơ̆ng đang hlŏh 18.000 kơ liêu vaccine tang găn jĭ Covid-19.

Tơblơ̆ nơ̆r: Amazưt