VOV4.Bahnar - ‘Năr 29/6, Jơ nŭm pơ gơ̆r kon pơ lei dêh char Gia Lai jăl XII (đơ̆ng 2021-2026) pôk rơih dôm kơ chư̆k chĕp kơ̆l tơm dơ nơm găh hơ năp jang đơ̆ng Jơ nŭm pơ gơ̆r kon pơ lei dêh char. Kiơ̆ kơ ‘nŏh, dôm bơ ngai tang măt Jơ nŭm pơ gơ̆r kon pơ lei dêh char jăl XII (đơ̆ng 2021-2026) hlôi tăh kơ phĭu pôk dôm kơ chư̆k lơ̆m Jơ nŭm pơ gơ̆r kon pơ lei dêh char, đei Kơ dră chĕp kơ̆l Jơ nŭm pơ gơ̆r kon pơ lei dêh char, dôm Phŏ kơ dră chĕp kơ̆l Jơ nŭm pơ gơ̆r kon pơ lei dêh char, Kơ dră păng Phŏ kơ dră dôm anih jang găh Jơ nŭm pơ gơ̆r kon pơ lei dêh char Gia Lai.

Ƀok Hồ Văn Niên đei pôk pơm Kơ dră chĕp kơ̆l Jơ nŭm pơ gơ̆r kon pơ lei dêh char Gia Lai jăl 12

Mă hơ tuch, hăm 70/71 kơ phĭu lui, ƀok Hồ Văn Niên- Kơ dră jang lơ̆m Trung ương Đảng, Bí thư đảng dêh char, Kơ dră chĕp kơ̆l Khul tang măt Kuô̆k hô̆i dêh char Gia Lai jăl XIV đei pôk pơm Kơ dră chĕp kơ̆l Jơ nŭm pơ gơ̆r kon pơ lei dêh char jăl XII (đơ̆ng 2021-2026). Ƀok Võ Ngọc Thành- Phŏ bí thư đảng dêh char, Kơ dră vei lăng kon pơ lei dêh char Gia Lai đơ̆ng 2016-2021 đei pôk pơm dơ̆ng Kơ dră vei lăng kon pơ lei dêh char đơ̆ng 2021-2026. Lơ̆m 4 ‘nu Phŏ Kơ dră vei lăng kon pơ lei dêh char Gia Lai đơ̆ng sơ năm 2021-2026, đei ƀok Đỗ Tiến Đông, ƀok Kpă Thuyên păng yă Nguyễn Thị Thanh Lịch đei pôk hơ tŏk dơ̆ng. Phŏ kơ dră vei lăng kon pơ lei dêh char ‘nao đei pôk ‘nŏh jĭ ƀok Hồ Phước Thành (sơ̆ pơm Kơ dră Anih tơ lĕch nơ̆r sơ kơ̆t, tơ mât jên jang dêh char Gia Lai.

Dơ̆ng: Tơ blơ̆