VOV4.Bahnar - Lăp đơ̆ng rŏng ƀô̆h lơ bơngai tơpŏh jĭ Covid-19 lơ̆m kon pơlei tim mă băt tơpŏh đơ̆ng yơ, kơsơ̆ năr 29/10, Dơnŏ anĭh chĕp pơgơ̆r tang găn jĭ Covid-19 pơlei tơm Pleiku dêh char Gia Lai hlôi chĭh pơtrŭh hla bơar athei rim tơring, hơnĭh jang tơlĕch jang kơtang rim trong jang tang găn jĭ.

Dơnŏ anĭh chĕp pơgơ̆r tang găn jĭ Covid-19 pơlei tơm Pleiku athei dơnŏ anĭh jang pơgang atok kơtang dăr lăng, vat tơring, hơmet pơ ‘lơ̆ng păng pơvang tang găn hloi hơnĭh đei jĭ ‘nao, khăm hơlem jơ̆p lơ̆m tơring vă tơchă păng tang găn kĕ tơdrong tơpŏh, hrôi hơnhăk F0, F1 lĕch vĕh đơ̆ng kon pơlei; pơkă athei kon pơlei tơ̆ pơlei tơm Pleiku tơdăh đei ƀô̆h chă chĕp pơgrŭn, hiĕn, dui jơhngơ̆m ư̆h kơ hiôk ... năm tơ̆ hnam pơgang tơring, phương hloi vă Test rĕnh Covid-19. Kơsơ̆ năr 29/10, dêh char Gia Lai đei 66 ‘nu bơngai ‘nao tơpoưh jĭ SARS-CoV-2 brŏk đơ̆ng tơring đei jĭ hơbŭh.

Tơblơ̆ nơ̆r: Amazưt