VOV4.Bahnar - Trong pơkăp hơtŏk unh hơyuh jơ̆ng ‘năr đơ̆ng Thủ tướng Teh đak lơ̆m Tơchơ̆t 13/2020/QĐ - TTg noh trong jang trŏ ƀlep vă vei xơđơ̆ng unh hơyuh teh đak. Tơpă tơ̆ Gia Lai, ăh tơlĕch jang kiơ̆ tơchơ̆t âu, atŭm hăm tơdrong mă lơ anih jang mŭk drăm pơkăp tơdrong choh jang xa vă đei yua đơ̆ng kơjă tĕch unh hơyuh kăp hloh hăm unh hơyuh jơ̆ng ‘năr tơ̆ bơbŭng hnam, noh oei đei tơdrong rơkăh hloh tong anê̆ pơtêng hăm tơdrong kăl unh, tŏk bŏk oei pơm ăn kơ hrĕng anih jang mŭk drăm axong jang găh tơdrong âu ƀơm kăt tơjur lê̆ (dang kăt ưh kơ răt unh) pơlơh băl. Tơdrong mă âu hlôi đei đơ̆ng blŭng xơnăm 2021 truh dang ei, păng tam mă băt truh lai yơ pơtơm pơtôch, pơm ăn anih axong jang pơngơ̆t kơ đon kơlih ưh đei yua kơsô̆ jên tih tên păng pơm jang tĕch pơdro tơhlăk tơhlĭn.

Ƀok Võ Ngọc Quý, Phŏ Kơdră Anih jang Unh hơyuh Gia Lai xơkơ̆t, anih jang unh hơyuh hlôi kơchĕng truh tơdrong rơkăh unh kơtă lơ̆m xơnăm 2020, ƀơ̆t pơm kiơ̆ pơkăp jang hadoi hăm anih jang mŭk drăm. Yuơ noh, 70 lơ̆m 463 anih axong jang drơ̆ng nơ̆r pơlăp ăh jê̆ đĭ xơnăm 2020 adoi kĭ pơkăp pơdrơ̆ng thêm găh tơdrong drơ̆ng nơ̆r kăt tơjur unh hơyuh mưh rơkăh lơ, nhen minh tơdrong pơkăp vă đei anih jang unh hơyuh drơ̆ng nơ̆r pơm jang hadoi găh tĕch răt unh hơyuh. Lơ̆m noh, đei 35 anih jang đei pơkăl pơlăp thêm kơmăi vă anih jang unh hơyuh pơdjoi kăt unh hơyuh đơ̆ng ataih mưh đei tơdrong kăl.

Tơpă dang ei noh, unh hơyuh jơ̆ng ‘năr tơ̆ bơbŭng hnam đei pơm tơlĕch tơ̆ Gia Lai noh hloh 603 MWp, lơ hloh ƀar ‘măng tơdrong kăl unh hơyuh kơ tơring noh 300 MWp. Tơdrong mă âu akŏp găh tơdrong jô̆ hơlen hơtŏk unh hơyuh pơhlom 10% minh xơnăm kơ anih jang unh hơyuh ưh kơ trŏ pơtêng hăm tơdrong kăl tơpă, pơm ăn tơdrong axong unh hơyuh hlôi rơkăh, dang ei roi rơkăh hloh dơ̆ng: “Ăh khei năr pơdjoi, kiơ̆ jô̆ hơlen đơ̆ng anih jang unh hơyuh kĕ iŏk yua unh đơ̆ng anih axong jang. Mă lei, kơyuơ răm đơ̆ng pơrang jĭ Covid-19, tơdrong hơtŏk unh hơyuh ưh đei nhen jô̆ hơlen noh đơ̆ng 9 truh 10% minh xơnăm, mă lei tơpă noh adrô̆ tŏk đơ̆ng 1 truh 2%. Thoi noh oei đơ̆ng 70 truh 80% rơkăh păng athei hơtŏk unh hơyuh đei pơm tơlĕch, pơm ăn tơdrong rơkăh unh hơyuh tôch lơ. Khul mă 1 jô̆ hơlen rơkăh noh đe xư pơkăp, đe xư athei pŭ đĕch. Noh jing tơdrong răm lơ̆m axong jang, noh anih axong jang athei vang glơng hăm anih jang unh hơyuh đĕch”

Yă Trần Thị Diễm, tơm kơ anih unh hơyuh jơ̆ng ‘năr tơ̆ bơbŭng hnam lơ̆m pơgar pơm tơlĕch 1MWp tơ̆ xăh Chư̆ Hậu, apŭng Ia Grai, Gia Lai ăn tơbăt, đơ̆ng khei 1/2021 truh dang ei, rim giĕng, kơmăi unh hơyuh 1MW kơ yă ƀơm kăt tơjur lơ̆m 1 năr, pơm hiong pơhlom 50 trĭu hlj minh khei. Yă Diễm ăn tơbăt: vă axong pơjing anih pơm tơlĕch unh hơyuh âu, yă axong truh 15 tih hlj, lơ̆m noh tŏk iŏk jên đơ̆ng anih mong jên 10 tih hlj. Kiơ̆ jô̆ hơlen mă blŭng, mưh kơmăi kơdâu nhen pơkăp noh lơ̆m 7 xơnăm đơ̆ng rŏng gô đei yua tôm kơsô̆ jên axong jang. Mă lei, tơdrong kăt tơjur hơnơ̆ng đơ̆ng anih jang unh hơyuh dang ei tŏk bŏk pơm ăn pơkăp jang mŭk drăm kơ yă ƀơm tơxŭl tơxăl: “Inh ƀôh huach unh hơyuh đĕch, pơrăm truh tơdrong pơyua kơ anih jang mŭk drăm. Dang ei, kiơ̆ pơkăp đơ̆ng Anih jang Unh hơyuh Gia Lai, noh lơ̆m 1 khei nhôn athei kăt tơjur đơ̆ng 4 truh 6 năr, pơrăm truh tơdrong pơyua lơ̆m khei kơ nhôn truh dôm jĭt trĭu hlj, pơm adar tơdrong kla jên ăn anih mong jên, pơrăm truh tơdrong jang jên hu”

Tơpă noh dang ei, tôm 463 kơmăi pơlăp unh hơyuh jơ̆ng ‘năr tơ̆ bơbư̆ng hnam pơgar tơ̆ Gia Lai adoi ƀơm kăt tơjur kiơ̆ 2 tơdrong noh kăt kơtă păng kiơ̆ pơkăp đei tơroi adrol. Kiơ̆ kơ noh, dôm anih jang hlôi đei pơkăl pơlăp kơmăi kăt tơjur đơ̆ng ataih noh gô ƀơm kăt kơtă, mưh găh anih tơm rơkăh unh hơyuh. Oei dôm kơmăi nai noh gô athei kăt đơ̆ng 4 truh 10 năr 1 khei. Tơdrong tơgăl kơ pơma noh, tơdrong kăt tơjur unh hơyuh hơnơ̆ng đei ƀôh ăh kơ ‘năr, ăh jơ mă unh hơyuh jơ̆ng ‘năr kơtang hloh, duh jing kơplăh mă dôm kơmăi âu akŏm đei lơ unh hơyuh hloh. Minh tơ ‘ngla pơgar axong 15 tih hlj pơlăp jê̆ 1MWp unh hơyuh jơ̆ng ‘năr tơ̆ bơbŭng hnam tơ̆ Ia Grai, mă ưh đei kĭ pơdrơ̆ng kăt tơjur, mă lei duh oei hơnơ̆ng ƀơm kăt tơjur unh hơyuh ăn tơbăt: “Rim năr ƀơm kăt tơjur noh hiong 8 trĭu hlj, khei năr iŏk tơvvih jên axong jang gô pơdui đunh hloh. Găh tơdrong tĕch răt hăm dih băl noh ưh đei hơtŏ hơnơ̆ng ôh. Kơlih găh anih axong jang đơ̆ng tơdrong kơdih jô̆ hơlen đei tơdrong pơyua ăn kơ po păng jing hê̆ bơngai pơm tơlĕch unh hơyuh mă ưh kơ băt gô tĕch đei dôm yơ, pơm ăn rim tơdrong jô̆ hơlen jing pơxuơ̆k pơxuơ̆l pơđĭ”

Ƀok Phạm Văn Binh, Kơdră Anih Kŏng thơng Gia Lai ăn tơbăt, tơring đei tô̆ ‘năr pơchră kơtang păng đei anih pơlăp tơlĕch unh hơyuh jơ̆ng ‘năr trŏ ƀlep hloh. Mă lei, gô truh đei trong pơkăp jang tơ̆ Tơchơ̆t 13/2020 noh dôm anih axong jang pơtơm pơm kiơ̆ kơtang. Lơ̆m xơnăm 2020, đơ̆ng jên axong jang kơ rơbâu tih hlj đơ̆ng dôm anih axong jang, anih jang unh hơyuh hlôi đei thêm unh hơyuh pơm tơlĕch hơtŏ hăm tơdrong pơm tơlĕch đơ̆ng Hnam kơmăi unh hơyuh Ialy.

Mă lei, tơpă dang ei, tơdrong mă anih jang unh hơyuh drơ̆ng nơ̆r pơlăp lang xă, pơm ăn tơdrong tơlĕch unh hơyuh rơkăh hloh ƀar ‘măng pơtêng hăm tơdrong kăl yua noh mă đei tơdrong kăt tơjur unh hơyuh, tŏk bŏk pơm huach unh hơyuh rơgoh ‘lơ̆ng păng huach jên đơ̆ng anih axong jang. Hơlen lăng lơ̆m tơdrong tơroh tĕch răt, jing anih jang adrô̆ răt unh hơyuh, mă lei kĭ pơkăp hăm lơ tơdrong jang, pơm ăn tơdrong axong lơ hloh tơdrong kăl, noh hơdăh anih jang EVN tŏk bŏk oei pơjing minh tơdrong tĕch răt mă kơdih po đĕch đei yua, pơm tơnap tap ăn dôm anih axong jang, pơm ăn đe xư Tăng kơ măt yuơ đơ̆ng unh hơyuh jơ̆ng ‘năr.

Lan chih păng pơre nơ̆r