VOV4.Bahnar - Pơ gê ‘năr 31/8, khŭl bơ̆ jang kơ dêh char Gia Lai hlôi ba 22 ‘nu drŏ kăn oei hơ năp păng 2 ‘nu hơ ioh tŏk bŏk oei tơ̆ Bình Dương brŏk tơ̆ pơ lei. Pơ đĭ dôm drŏ kăn, hơ ioh âu hlôi ba tơ̆ hơ nih ăn oei hơ drô̆ akŏm E991 kơ dêh char Gia Lai. Dôm bơ ngai âu gô đei ăn oei hơ drô̆ păng hơ len lăng lơ ‘măng. Găh lơ dôm drŏ kăn ăn brŏk ‘măng âu tă kơ oei hơ năp loi 6 khei, đei tơ drong arih sa mơ mat ngăl, mă loi ‘noh jĭ đei bơ ngai oei hơ năp khei mă 9.

Vă  ba kơ sô̆ kon pơ lei âu brŏk, Gia Lai hlôi hơ met ăn 1 ‘nu ƀak si păng 2 ‘nu iŏk đe hơ nhơl năm kiơ̆ khŭl vă hơ met pơ ‘lơ̆ng mưh đei ƀôh tơ drong. Hơ drol ‘noh, Anih vei lăng găh tơ drong jang - linh jĭ rơ ka păng tơ pôl Gia Lai păng păh Bình Dương hlôi jang hơ dai, tơ gŭm hơ len lăng, hơ met ăn kon pơ lei Gia Lai năm tơ̆ hơ nih akŏm tŏk hao gre brŏk tơ̆ pơ lei. Blŭng a tơ chĕng đei 25 ‘nu drŏ kăn păng 4 ‘nu hơ ioh đei ba brŏk, mă lei yua kơ jơ hngơ̆m jăn, lăp đei  24 ‘nu gơh brŏk đĕch. Pơ đĭ 22 ‘nu drŏ kăn oei hơ năp păng 2 ‘nu hơ ioh brŏk tơ̆ dêh char tă kơ vei sơ đơ̆ng jơ hngơ̆m pran ngăl, ‘măng năm brŏk hiôk, sơ đơ̆ng.

Thuem: Tơ blơ̆