VOV4.Bahnar - ‘Năr 18/10, khŭl bơ̆ jang kơ dêh char Gia Lai hlôi sơng 296 ‘nu kon pơ lei ‘noh đei drŏ kăn oei hơ năp, hơ ioh, bơ ngai kră, bơ ngai kon kông bơ̆ jang, arih sa tơ̆ tơ ring đei jĭ găh pơ băh vĭh truh tơ̆ tơ ring sơđơ̆ng. Hơ drol ‘noh, khŭl bơ̆ jang kơ dêh char Gia Lai ‘noh đei 22 ‘nu, hăm tơ drong tơ gŭm đơ̆ng 13 tong gre chơ tơ moi giơng ƀĭch hnam gre Phương Trang hlôi năm sơng iŏk kon pơ lei kơ dêh char tơ̆ tơ ring đei jĭ. Khŭl klăih song pơm 3 grŭp sơng  kon pơ lei tơ̆ 3 hơ nih tơ̆ 2 dêh char Bình Dương, Đồng Nai păng pơ lei tơm Hồ Chí Minh. Truh 15 jơ ‘năr 17/10, khŭl pơ tơm năm păng vih truh Gia Lai lơ̆m pơ gê ‘năr 18/10. Lăp ƀơ̆t truh hơ nih ăn oei hơ drô̆, dôm kon pơ lei đei kang ƀô̆, khŭl linh pơ tho ôp ti, hơ len lăng yuh hơ kâu; tơ roi tơ băt y tế; hơ dai hăm ‘noh pơ gơ̆r klăih song trong, hơ met ăn oei hơ drô̆ sơ sơ̆ng păng ƀlep tơ drong hơ găt. ‘Măng âu, tơ chĕng hơ drol blŭng a dêh char gô sơng 604 ‘nu ră, mă lei yua kơ đei tơ drong kơ na kơ sô̆ bơ ngai vih tŏ sĕt hloh.

Thuem: Tơ blơ̆