VOV4.Bahnar - Kiơ̆ kơ Anih vei lăng găh kơ măy kơ mŏk mơ dro sa dêh char Gia Lai, đơ̆ng blŭng sơ năm truh dang ei, akŏp jên tĕch tơ lĕch tơ mam tơ̆ teh đak đe kơ dêh char jô̆ pơ hlom đei 360 triệu đô lar, đei 59 % trong tơ lĕch jang kơ pơ đĭ sơ năm, tŏk 22,3% pơ têng hăm khei ‘nâu sơ năm sơ̆. Lơ̆m noh, chĕh phe ‘noh jĭ tơ mam tĕch tơ lĕch tơ̆ teh đak đe tơm, đei 57,5% akŏp kơ jă tĕch tơ lĕch tơ̆ teh đak đe. Mă hơ dăh ‘noh lơ̆m 7 khei âu ki, kơ sô̆ tĕch tơ lĕch cheh phe tơ̆ teh đak đe tơ̆ Gia Lai đei 138 rơ bâu tấn, hơ tŏ hăm kơ sô̆ 207 triệu đô lar. Pơ têng hăm khei ‘nâu sơ năm 2020, tĕch tơ lĕch cheh phe tơ̆ teh đak đe tŏk hloh 20% găh kơ sô̆ păng tŏk hloh 24% găh kơ jă.

Anih vei lăng găh kơ măy kơ mŏk mơ dro sa Gia Lai tơ băt, khei ‘năr âu ki, rim anih jang tĕch tơ lĕch cheh phe tơ̆ teh đak đe hlôi tơ tĕnh pơ jing tơ ring pơ tăm cheh phe hloh 34 rơ bâu hek tar kiơ̆ hơ găt ‘lơ̆ng 4C, UTZ, Organic; đei trong tơ lĕch jang, pơ gơ̆r pơm tơ lĕch lăp hăm tơ drong pơ rang jĭ, pơm ‘lơ̆ng kơ sô̆ đơ̆ng tơ pu, tơ mam ‘lơ̆ng, tơ chă băt tơm a pơm tơ lĕch, băt kơ năl tơ mam ‘lơ̆ng, tơ mơ̆t yua ‘lơ̆ng dôm tơ drong tơ gŭm đơ̆ng rim tơ drong tơ chơ̆t mơ dro sa.

Thuem: Tơ blơ̆