VOV4.Bahnar - Jô̆ truh hơ tuch khei 10/2021, tơ̆ dêh char Gia Lai đei hloh 42.600 ‘nu bơ ngai jang đơ̆ng rim dêh char, pơ lei tơm găh pơ băh brŏk veh ver kơ jĭ COVID-19. Dêh char Gia Lai tŏk bŏk akŏm tơ chă ăn tơ drong jang ăn kơ sô̆ bơ ngai jang âu, vă vei sơ đơ̆ng tơ drong jang vei lăng sơ đơ̆ng tơ drong arih sa tơ pôl lơ̆m tơ drong jĭ hơ buh.

Mơ̆t lơ̆m pơ yan phĕ cheh phe, bơ ngai jang gô đei hơ met ăn tơ drong jang

Lơ̆m khei 10/2021, Anih vei lăng găh bơ ngai jang - linh jĭ rơ ka păng tơ pôl Gia Lai hlôi tơ kkep hơ dai hăm rim dêh char Bình Dương, Đồng Nai, pơ lei tơm Hồ Chí Minh vă băt hơ dăh tơ drong ‘mĕh vă chă bơ ngai jang păng trong tơ gŭm đơ̆ng anih jang mơ dro sa; tơ roi tơ băt, krao hơ vơn, tơ lĕch trong jang ăn 4.200 ‘nu bơ ngai jang năm bơ̆ jang hơ lơ̆k dơ̆ng; anih jang chă tơ ƀôh tơ drong jang dêh char Gia Lai kŭm hlôi pơ gơ̆r lơ ‘măng pơm hla ar chă bơ ngai jang tơ̆ dôm apŭng, thị xăh, pơ lei tơm, tơ chă ăn tơ drong jang ăn kơ hrĕng ‘nu bơ ngai jang. Dang ei, dêh char pơ tơm mơ̆t lơ̆m pơ yan phĕ cheh phe păng chrek kơ tăk kơ su, rơ bâu ‘nu bơ ngai jang kon kông kŭm gô đei tơ chă ăn tơ drong jang.

Thuem: Tơ blơ̆