VOV4.Bahnar - Kơ sơ̆ ‘năr 29/10, Khŭl hơ len lăng kơ Anih tơm vei lăng găh bơ ngai jang linh jĭ rơ ka păng tơ pôl yua đơ̆ng Kơ dră Anih vei lăng tơ drong jang Vũ Trọng Bình pơm kơ dră khŭl, hlôi đei jơ bơ̆ jang hăm Anih vei lăng găh bơ ngai jang linh jĭ rơ ka păng tơ pôl dêh char Gia Lai găh tơ drong jang kiơ̆ rim trong jang tơ gŭm tơ drong arih sa tơ pôl, tơ gŭm bơ ngai jang păng iŏk yua bơ ngai jang tŏk bŏk tơ ƀơ̆p mơ mat tat yua đơ̆ng jĭ hơ buh Covid - 19. Tơ̆ jơ bơ̆ jang hăm khŭl dăr hơ len, rim bơ ngai tang măt kŭm tơ lĕch dôm trong jang găh tơ iung ming păng hơ tŏk tơ iung bơ ngai jang lơ̆m păng đơ̆ng rŏng jĭ Covid-19.

Dôm trong jang hơ met pơ ‘lơ̆ng mơ mat tat ăn anih jang mơ dro sa, hơp tak xăh, unh hnam tĕch mơ dro sơ đơ̆ng pơm tơ lĕch vă sơng đei bơ ngai jang, tơ gŭm bơ ngai jang bơ̆ jang hơ lơ̆k dơ̆ng. Pơ ma tơ̆ jơ bơ̆ jang, Kơ dră Anih vei lăng tơ drong jang Vũ Trọng Bình lăng ‘lơ̆ng tơ drong jang kiơ̆ rim trong jang tơ gŭm đei tơ lĕch jang tơ tĕnh, ‘lơ̆ng. Tơ̆ hơ năp kơnh, anih jang kơ pal kơ dêh char Gia Lai hơ nơ̆ng hơ tŏk tơ iung, hơ nhăk trong jang tơ gŭm truh ƀlep bơ ngai đei ƀơm ưh kơ ‘lơ̆ng đơ̆ng jĭ hơ buh Covid-19.  

Thuem: Tơ blơ̆