VOV4.Bahnar - Khei ‘năr âu ki, Dơ no\ an^h vei lăng kon pơ lei dêh char Gia Lai păng khul kơ dră pơ gơ\r dôm tơ ring hlôi pơ truh lơ kơ so# jên ăn An^h mong jên tơ gu\m tơ pôl dêh char, kiơ\ đơ\ng no\h tơ gop ‘lơ\ng ăn tơ drong jang tơ jur tơ nuh hin tơ\ dêh char.

Sơ năm 2019, An^h mong jên tơ gu\m tơ pôl dêh char asong to\k io\k hlo\h 72 ti hlak jên, hăm hlo\h 1.900 unh hnam đei to\k io\k. Mă tơ pă, tơ drong ‘me\h vă to\k io\k jên đơ\ng kon pơ lei oei tôch lơ, vă pơm lăp hăm tơ drong athei hơ to\k jên to\k io\k, pơih xă bơ ngai gơ\h to\k io\k ‘no\h athei đei lơ kơ so# jên mong ako\m ‘năi.

Đơ\ng blu\ng sơ năm 2020, dêh char Gia Lai hlôi tơ le\ch lơ trong jang tôch rơ đăh. Lơ\m no\h athei dôm an^h jang kơ pal, Dơ no\ an^h vei lăng kon pơ lei jơ\p tơ ring, An^h mong jên tơ gu\m tơ pôl dêh char tơ le\ch jên đơ\ng An^h jang đảng dêh char pơ jao, vă pơih xă tơ drong asong to\k io\k hăm unh hnam tơ nuh, unh hnam kon pơ lei kon kông, tơ gop ăn tơ drong jang tơ jur tơ nuh hin păng pơ jing tơ ring tơ tang ‘nao.

Dơ\ng: Tơ blơ\