VOV4.Bahnar -  Mă đơ̆ng tơdrong jĭ Covid-19 pơrăm kơtang, mă lei 6 khei au ki, dêh char Gia Lai oei iŏk đei tŏk kơtang 9,7%. Jơnei au đei tơgop gĭt kăl lơ̆m tơdrong dêh char pơjing rơvơn atok tơ iung 2 hơnĭh jang mŭk drăm tơm ‘nŏh ŭnh hơyŭh jơ̆ng ‘năr, kial păng rong kon tơrong hăm kmăi kmŏk hơgei. ‘Nau nơ̆r tơchơ̆t hơdăh đei pơma tơlĕch tơ̆ Hop akŏm Khŭl kơdră chĕp pơgơ̆r Đảng dêh char ‘măng mă 4 đei Dơnŏ anĭh Đảng dêh char Gia Lai pơgơ̆r lơ̆m năr 2/7. Kiơ̆ đơ̆ng tơbăt tơ̆ hop akŏm, 6 khei au ki, akŏp kơ jă tơmam drăm hnam kmăi pơm tơlĕch tơmam drăm kơ dêh char au iŏk đei hlŏh 11.000 ti hlak jên, tŏk 17% pơtêng hăm sơnăm sơ̆; akŏp kon jên tơmơ̆t jang lơ̆m tơpôl tơ̆ Gia Lai dang 33.500 ti hlak jên. Mĭnh poăt kơsô̆ au đei đơ̆ng tơlĕch jang rim tơdrong jang ŭnh hơyŭh kial tơ̆ tơring, hăm kon jên tơmơ̆t jang 17.000 ti hlak jên. Atŭm hăm ‘nŏh, hrei au Gia Lai đei 33 tơdrong vă jang rong kon tơrong hăm kmăi kmŏk hơgei đei ăn tơmơ̆t jên jang, hăm kon jên jang hlŏh 4.500 ti hlak jên. Jei lơ̆m khei năr kơnh, dêh char gô pơtăm ‘nao 131 ha bri, tơplĭh hlŏh 700 ha ‘long pơtăm iŏk yua ư̆h kơ jăp.

Tơblơ̆ nơ̆r: Amazưt