VOV4.Bahnar - Phang pơđang đunh khei ‘năr, đak tu păng rim dơnau đak jei krơ̆ kroi kơna lơ chun na ƀa phang tơ̆ apŭng Chư̆ Păh dêh char Gia Lai kro joi.

Kon pơlei sơ ‘nhôi ƀơ̆t chŭn na ƀa đak kro joi

Tơmang lăng hơvĕn chŭn na ƀa đak Ia Sah rơ ông rơ ang, ƀok Rơ Chăm Chíu, kon pơlei kơ pơlei Mrông Yô̆ 2, tơring Ia Ka, apŭng Chư̆ Păh, sơ ‘nhôi sơ ‘ngon. Pơyan ƀa phang au ŭnh hnam nhôn hiong răm pơgŏh, păng ƀok jei tim mă băt vă tơplih trong jang sa lơ liơ vă ŭnh hnam iŏk yua kơ jăp lơ̆m khei năr kơnh:“ Ŭnh hnam jang 3 sao ƀa, lơ̆m 1 sao yô̆ prĕh đei 6-7 tă ƀa, rim sơnăm ŭnh hnam oei sŏng sa măh. Mă lei sơnăm au ‘nŏh ư̆h kơ măh lơ̆m mă lơ bơngai tŏk bŏk yoă, ƀa lôch pơgŏh kơ yuơ ư̆h kơ đei đak chă pơro ăn, dang ei tĕh đak chă pơtho ăn kơ nhôn pơtăm ‘long pơtăm yă kiơ tơ̆ au lei ba pơm kiơ̆ tĕh đak đĕch”

Atăih kơ chŭn na ƀok Rơ Chăm Chíu ư̆h kơ măh hơtăih, vă jê̆ 4 sao ƀa đak kơ ƀok Rơ Chăm Luyên, jei kro joi.Kiơ̆ đơ̆ng ƀok Luyên, ‘nau sơnăm mă 2 ŭnh hnam ư̆h kơ yô̆ đei ƀa lơ̆m chun na hơvĕn Ia Sah.“ Mĭnh ƀar sơnăm sơ̆ oei sŏng sa măh, 2, 3 sơnăm kơ au ư̆h kơ đei đak, phang pơđang păng kro đĭ. Hơpơi kơdră tơring, Đảng, Tĕh đak lăng năng chŭn na au tơplĭh pơtăm ‘long pơtăm yă kiơ mă lăp ăn kon pơlei”

Mĭnh hơvĕn chŭn na phang pơđang pơm ăn ƀa lôch rơ ông rơ ang

Ƀok Hoàng Văn Thành, Kơ iĕng kơ dră Dơnŏ anĭh vei lăng kon pơlei tơring Ia Ka, apŭng Chư̆ Păh tơbăt, lơ sơnăm au kon pơlei bơngai Jrai tơ̆ au lăp jang ƀa iŏk đak đơ̆ng hơbong thoong đak đĕch, ư̆h kơ đei pơchŏh ăn đak đơ̆ng rim Pơnơ̆t đak ôh. Sơnăm au, phang pơđang đunh khei ‘năr, thoong hơboong đak hrơ̆ hroi kơna găh să ƀa đak đĭ kro joi. Chĭh jô̆ ‘măng mă blŭng, hlôi đei hlŏh 70 ha ƀa phang tơ̆ tơring lôch răm kơtang, hăm vă jê̆ 200 ŭnh hnam kon pơlei đei ƀơm kơnê̆, găh lơ oei lơm pơlei Mrông Yô̆ 1 păng 2. Ƀok Hoàng Văn Thành, tơtăm, tơdăh kwodră kơpal ư̆h kơ jăh hrôih pơtho ăn kon pơlei tơplĭh ‘long pơtăm, hiong răm lơ̆m pơyan ƀa phang oei hơnơ̆ng lơ̆m dôm sơnăm kơnh dơ̆ng:“ Ƀlep jơ ‘năr au jei apĭnh kơdră kơpal đei trong tơgŭm djru tŏ sĕt ăn kon pơlei jang sa dơ̆ng. Kiơ̆ tơdra hơdrol, lơ̆m sơnăm kơnh gô phang pơđang hơnơ̆ng, Dơnŏ anĭh vei lăng kon pơlei tơring gô jang hơdoi hăm rim hơnĭh jang kơpal, adoi gô jang hơdoi kơ jăp hăm kon pơlei vă pơtho ăn kon pơlei pơtăm ‘long pơtăm trŏ ƀlep hăm tŏ ‘mi kial, groi tĕh lơ̆m pơyan phang kơ rim sơnăm đơ̆ng rŏng”

Ƀok Trần Đắc Thắng, Kơ iĕng Kơdră chĕp pơgơ̆r Dơnŏ anĭh vei lăng Chŏh jang sa păng atŏk tơ iung tơring tơrang apŭng Chư̆ Păh tơbăt, hơnih au hlôi jang dăr lăng đĭ đăng chŭn na ƀa đak lơ̆m apung.Pơyan ƀa Phang sơnăm au, lơ̆m apŭng rei pơtăm đei 1.700 ha ƀa ‘nŏh đei hlŏh 170 ha ƀa răm phang pơđang păng  kro joi. Vă hơmet pơ ‘lơ̆ng găh ‘long pơtăm, mă kăl hăm ƀa tok bŏk phang pơđang pơrăm, ƀok Trần Đắc Thắng, tơbăt:“Dơnŏ anĭh vei lăng chŏh jang sa păng Atŏk tơ iung tơring tơrang hlôi jang hơdoi kơ jăp hăm Hơnĭh tơm tĕch mơdro tơmam drăm chŏh jang sa apŭng adoi nhen Dơnŏ anĭh vei lăng kon pơlei rim tơring iung jang dăr lăng đĭ đăng hơgăt tĕh jang sa pơyan phang, mă kăl ‘nŏh hăm ƀa. Lăp ăn rĕi pơtăm tơ̆ chŭn na măh mai đak chă pơro, hăm dôm chŭn na ư̆h kơ đei măh đak ‘nŏh athei kon pơlei chă pơtăm ‘long pơtăm anai vă hoei hiong răm đơ̆ng phang pơđang pơm ăn”.

Bơngai chĭh: Hoàng Qui

Tơblơ̆ nơ̆r: Amazưt