VOV4.Bahnar - Jô̆ truh kơ sơ̆ ‘năr 18/10, dêh char Gia Lai hlôi ƀet vaccine COVID-19 ăn vă jê̆ 301 rơ bâu ‘nu. Lơ̆m noh tơ̆ pơ lei tơm Pleiku, kơ sô̆ ƀet bơ̆ng ăn bơ ngai kơ pal kơ 18 sơ năm hlôi đei hloh 80%.  Truh 5 jơ kơ sơ̆ ‘năr 18/10, dêh char Gia Lai hlôi pơ gơ̆r ƀet ăn kơ hloh 300.900 ‘nu. Lơ̆m noh hloh 72.100 ‘nu hlôi đei ƀet đang 2 jrŭm păng hloh 229.000 ‘nu hlôi đei ƀet jrŭm 1.

Thoi noh, tơ̆ Gia Lai, dang ei đei 31% kơ sô̆ bơ ngai đơ̆ng 18 sơ năm tơ̆ kơ pal hlôi đei ƀet tŏ sĕt hloh 1 jrŭm vaccine COVID-19. Rim tơ ring lơ̆m dêh char đei kơ sô̆ ƀet vaccine lơ hloh ‘noh pơ lei tơm Pleiku (82%), Thị xã Ayun Pa (40%), Thị xã An Khê (29%).  Yă Nguyễn Thị Thanh Lịch- Phŏ Kơ dră Anih vei lăng kon pơ lei dêh char Gia Lai tơ băt, tơ drong tơ lĕch jang ƀet vaccine hrĕnh ‘noh jĭ 1 lơ̆m dôm tơ drong jang gĭt kăl vă dêh char tơ lĕch jang pơ̆ih ‘măng, tơ iung ming mŭk drăm - tơ pôl tơ̆ hơ năp kơnh.

Thuem: Tơ blơ̆